Kyagulanyi ari omuri Kisoro kurondera akaruuru okwatiire ekigombe kya NUP ebendera, Salim Sultana omu karuuru ka Kisoro. Photos by Job Namanya.

N’ebya Job Namanya

KISORO

Purezidenti w’ekigombe ekya National Unity Platform (NUP), Robert Kyagulanyi Ssentamu orikumanywa nka Bobi Wine nashaba abantu ba Kisoro kurekyeraho kuhagira ekigombe ekya NRM baaba bari abakuganyirwa omu gavumenti egi.

Kyagulanyi ashabire abantu ba Kisoro okurekyeraho kuhagira ekigombe ekya NRM baaba nibenda kwetunguura.

Kyagulanyi ari omuri Kisoro kurondera akaruuru okwatiire ekigombe kya NUP ebendera, Salim Sultana, omwe ahabesimbireho omu karuuru k’okugaruka kutoorana Omuny’ishengyero-kazi wa Kisoro akarateerwe Orwakana rwa wiiki egi ebiro 14.11.2024.

Kyagulanyi yaheza kuhika omuri Kisoro kurondera akaruuru okwatiire ekigombe kya NUP ebendera Salim Sultana omu karuuru ka Kisoro.

Arikugambira abantu abahikire ahari Kisoro Mayor's Gardens omu Munisiparite ya Kisoro, Kyagulanyi ayorekire ngu Kisoro efeereirwe munonga ahabw’obutagira abeebembezi abarikufayo.

Kyagulanyi ayongiire yagambira abantu ba Kisoro ngu kuri nogira ngu niwe ari omu bwebembezi, Kisoro ekabaire nereebeka gye nka Switzerland.

Kyagulanyi hamwe n'okwatiire ekigombe kya NUP ebendera Salim Sultana omu karuuru ka Kisoro barikuronda akaruuru omu bashagiki baabo.

Ebyo bikiri aho, Elly Maate- Omugambirizi wa Pooriisi ahabw’ekyanga ekya Kigezi naagura ngu eby’okwerinda byongiirwemu amaani kureeba ngu akaruuru aka kahwa omu busingye.

Abandi bantu abetsimbireho omu karuuru aka barimu; Rose Kabagyeni owa NRM, Grace Ngabirano Akifeza (Independent), Aisha Cyimpaye owa People's Progressive Party (PPP), Juliet Musanase owa FDC na Mable Ingabire owa UPC.

Akaruuru aka nikeija kuteerwa ebiro 14.11.2024 kutoorana oraaze omu bigyere by’owabaire ari omuntebe egi Sarah Mateke Nyirabashitsi kandi ari na minisita w’eihanga ow’enshonga z’amahe n’abankazirwaho owafiire omu kwezi kwa 9, 2024.

#WestUpdates