Sarah Bainomugisha, omutuura wa Kisoro-Kasasa arikusindika egaari ebaire eriho eby'okurya arikwambuka orutindo orwa Wambabya. Photos by Peter Abaanabasazi.

N’ebya Peter Abaanabasazi   

HOIMA

Abatuura kuruga omu kyaro ekya Kasanga n’ekya Ruyanja omu muruka gwa Kibingo omuri Hoima west division omu disiturikiti eya Hoima tibashemeriirwe n’okukyererwa kukora aha rutindo rwabo orwabombokire aha mugyera gwa Wambabya.

Orutindo oru rukatwarwa amaizi g’enjura ameezi 2 agahingwire beitu n’okuhisya tirukakozirweho.

Kiiza Erukana arikumanywa nka Katafari, ceeyamaani w’ekyaro ekya  Ruyanja naagira ngu  ebyaro bingi bifeereirwe entaasya ahabw’okuba tibakibaasa kutambuza emishuuburo yaabo kandi tibakihurizana.

" Nk’abeebembezi, eki n’ekizibu ky’amaani kandi kiturengire,” Erukana arikushoborora.

Sarah Bainomugisa, ow’ekyaro ekya Kisoro- Kasasa naagira ngu naaba aine kwambuka orutindo oru burizooba kuza omu misiri ye erikushangwa omu kyaro ekya Kyakabale omu woodi ya Kiduma.

Nakyoreka ngu okwambuka orutindo oru orucwekire nikita amagara geo mu kabi beitu aine kururabaho ahabw’okuba taine muhanda ogundi ogu arikubaasa kutoora arikwongyeraho ngu n’embeera y’orutindo oru rurimu eteeganiise abaana b’amashomero.

John Tumusiime, omutuura ondiijo nawe nayoreka okukwatwaho ahabw’okukyererwa kuhunduuza orutindo oru arikwongyeraho ngu abatuura kuruga omu byaro bitari bimwe tibakibaasa kwambuka kuza omu kyaro ekindi.

Orutindo rwa Wambabya orutengukire bwanyima y'enjura kugwa omu kicweka eki. Eki kiteeganiise entambura y'abatuura.

Robert Ruhigwa, Meeya wa Hoima West divijoni nagaira ngu orutindo oru tirya divijoni arikwongyeraho ngu orutindo oru rushemereire kuba nirukorwa orurembo rwa Hoima.

Beitu hoona naagira ngu, abeebembezi ba divijoni bariyo nibagamba n’abeebembezi b’omu rurembo kureeba ngu orutindo oru barugaruzaho nikwo kushaba abatuura kugira okugumisiriza arikubaraganisa ngu orutindo rwabo nirwija kukorwaho omu bwire butari bwa hare.

Bonny Kiiza, Ingyiniya w’orurembo orwa Hoima nashoborora ngu tiimu ye eheerize kuhunduuza orutindo oru beitu n’eky’obusaasi orutindo rutwirwe amaizi obu enjura ebaire neegwa ereteire omugyera ogwa Wambabya kwijurirana.

#WestUpdates