Purezidenti Museveni yahika omuri Kisoro ah'eishomero erya Muramba P/S kurondera akaruuru Rose Kabagyeni, okwatsire ebendera ya NRM omu karuuru ka Kisoro. Photos by Job Namanya.

N’ebya Job Namanya

KISORO

Purezidenti Yoweri Kaguta Museveni kandi ori na ceeyamaani w’ekigombe ekya NRM yaherize kuhika omu disiturikiti ya Kisoro kurondera akaruuru Rose Kabagyeni, okwatiire NRM ebendera omu karuuru k’okugarukamu kutoorana Omuny’ishengyero-kazi wa Kisoro.

Museveni yatandikira aha ruteerane ah’eishomero erya Muramba Primary School omu gomborora eya Muramba omuri Bufumbira South, omu disiturikiti eya Kisoro.

Rose Kabagyeni, okwatsire ebendera ya NRM omu karuuru ka Kisoro n'abandi beebembezi ba Kisoro aha ruteerane ah'eishomero erya Muramba P/S omuri Kisoro.

Purezidenti Museveni yashaba abantu ba Kisoro kuteera akaruuru k’enshonga kandi yabaraganisa ngu enguuto zaabo ezitakozirweho nizeija kukorwaho.

Purezidenyi yayoreka ngu gavumenti ekozire enguuto nyingi omu eihanga kandi enkye ezisiigireyo nazo nizeija kukorwa.

Museveni yajumirira abeembebezi ba disiturikiti ya Kisoro ahabw’okutafayo kuhweraho omu kuteereza enguuto ezirimu amabaare.

Purezidenti Yoweri Museveni arikugambira enkuyanja y'abantu abahika aha rally ah'eishomero erya Muramba P/S omuri Kisoro.

Mukuru w’eihanga yashoborora nk’oku gavumenti eteireho amaani omu kuhisya abantu boona omu eihanga amashanyarazi.

Purezidenti yagira ngu gavumenti ya NRM egyerizeho kuhisya obuheereza bw’amashomero omu bantu ba Kisoro ngu nahabw’ekyo hariho enshonga y’okuteerera gavumenti ya NRM akaruuru.

 Aha ruteerane oru, abeebembezi batari bamwe kuruga omu kyanga ekya Kigezi n’abandi kuruga omu kigombe ekya NRM.

Purezidenti yaheza kuruga ah’eishomero erya erya Muramba Primary School naija kugiraho oruteerane orundi ahari Saaza Grounds omu Munisiparite eya Kisoro.

Omu bigambo bye, Purezidenti Museveni yayoreka ngu gavumenti eriyo nerwanisiza kimwe enkora mbi y’okushashuza abaana omu mashomero ga gavumenti kureeba ngu bashomera busha.

#WestUpdates