Abantu barikurenga 100 bakwateirwe omumuhigo gw’okurwanisa enkozi z’ebihagaro.

N’ebya John Masaba

Pooriisi ekwatsire abantu barikurenga omuri 100 omu eihanga ryona omu muhigo ogukozirwe kurwanisa enkozi z’ebihagaro omu kwetegurira ebiro bikuru.

Gumwe aha mihiigo egi gukozirwe omuri Kireka Bweyogerere omuri Wakiso ahabiro 29.11.2024 ahagati ya shaaha 3 z’ekiro kuhisya 8 z’ekiro.

Arikugambaho n’abanyamakuru omurukiiko rw’ebitongore by’okwerinda orw’amakwatane ahari Naguru, Kampala aharw’okubanza ebiro 02.12.2024, Omugambirizi wa Pooriisi, Rusoke Kituuma naagira ngu omuhigo ogu gutwirwe omu bicweka ebindi ebirimu; Kirinya, Kakajjo, Mbalwa na Namugongo, ahi abantu 38 bakwateirwe n’ebindi bintu ebirimu amairungi kandi n’ebintu by’omu nju ebyayibirwe bizoirwe.

Naagira ngu omuhigo ogu gukozirwe Pooriisi n’ebindi bitongore by’okwerinda.

Kituuma nayongyeraho ngu entebeekanisa zahwire ez’okutwara abakwatsirwe omu kooti arikwongyeraho ngu ab’eby’okwerinda beehireyo kureeba ngu barindwa gye kureeba ngu ebiro bikuru byahwa omu busingye.

Nashoborora ngu bagarukire bakora omuhigo ogundi omuri Kauga hamwe na Nantabiririlwa omuri Mukono ahi abantu 25 bakwateirwe.

Omuri Iganga, Pooriisi ekwatsire abantu 23 omu bicweka ebya Kasolo na Bugabwe kandi amairungi n’ebindi bintu by’omu nju bizoirwe, Okurugiirira ahari Kituuma.

Omu disiturikiti eya Bugiri, Kituuma naagira ngu bakwatsireyo abantu 30 omuri Katumba Zone kandi omuri Kyanja omu disiturikiti eya Kampala bakwatsire abantu 40.

Kituuma nashoborora ngu emihiigo egi neija kugumizamu kuhisya obu enkozi z’ebihagaro zirahwereho kimwe.

#WestUpdates