Abantu barikurenga 40 bakwateirwe obushuma omu rurembo rwa Mbarara. Photo by Police.

Abantu barikurenga 40 bakwateirwe obushuma- Mbarara.

N’ebya Omushaki weitu

MBARARA

Pooriisi omuri Mbarara ekwatsire abantu 41 abarikugambwa kuba batwire nibanyangaraza abatuura b’omu rurembo rwa Mbarara.

Aba bakwateirwe omu kikwekweto kya Pooriisi ekikozirwe omuri Mbarara ahi bashangirwe n’amairungi oteireho n’ebibabaire nibakoresa kuhenda amaju g’abantu.

Omu bakwatsirwe harimu; abaana b’abooja 11 hamwe n’abaishiki bato 5.  

Samson Kasasira, Omugambirizi wa Pooriisi ahabw’ekyanga ekya Rwizi naagira ngu abantu 41 abakwatsirwe bashangirwe omu myanya nk’ogwa Kakoba roundabout ahansi y’omuti, Lubiri hamwe n’enyima y’ekyombeko kya London Arcade.

Kasasira naagira ngu ekikwekweto eki kizireho bwanyima y’abatuura hamwe n’abashuubuzi b’omuri Mbarara kwetomboita aha nkozi z’ebihagaro abarikuhenda amaduuka, okubategyera omu mihanda hamwe n’okubibaho ebintu byabo baaba nibatambura ahanguuto z’omuri Mbarara.

Faayiro y’emishango y’abakwatsirwe eyigwirweho kandi nibaija kutwarwa omu kooti bwanyima y’okucondooza kuhwa.

Kasasira naagira ngu ab’eby’okwerinda bongiire amaani omu bikwekweto omu kyanga ekya Rwizi omu kwetegurira ebiro bikuru ahi enkozi z’ebihagaro barikukira kweyongyera.

Nashaba abantu okuza aha buzoora maisho obwire bwona Kwenda kwerinda enkozi z’ebihagaro.

#WestUpdates