Betty Cherotich, 31, osindikirwe aha rumanda ahabw'okugambwa kuba yayitsire omushaija we, Dr. Jino Abiriga.Photo by Yosam Gucwaki.

N’ebya Yosam Gucwaki 
 
Abantu 3 abarikuteekatekwaho kuba bayetabire omu kwita Dr. Jino Abiriga- obaire nakora nka mukuru w’eby’amagara omu disiturikiti eya Masindi basindiikirwe aha rumanda omu kihome kya gavumenti ekya Hoima. Aba bateirwe aha rumanda kuhisya ebiro 30/01/2024.

Abarikuteekateekwaho baretsirwe omu kooti ya Masindi shaaha nka 8 z’eihangwe Orwakabiri ahagati y’eby’okwerinda by’amaani.

Abashatu aba barimu Betty Cherotich, 31, Martin Kipsang, 42, hamwe na Joshua Namureng, 36, kandi basindiikirwe aha rumanda omuramuzi wa kooti ya Masindi, Kosia Kasibayo bwanyima y’okubataho omushango gw’obwitsi.

Joshua Namurenge na mutaahi we Martin Kipsanga aha kooti ya Masindi. Photo by Yosam Gucwaki

Kasibayo agizire ngu aba tibashemeriire kugira ekibagamba ngu ahabw’okuba omushango gwabo niguhurirwa omu kooti enkuru.

"Omushango ogu gukiriyo nigucondozibwaho. Nitushaba ngu abarikujunanwa basindikwe aha rumanda tubanze tumariire okucondooza, Florence Akello, omuhwezi wa Dayirekita wa ofiisi y’omuhababi mukuru wa gavumenti ahabw’ekyanga eki.

Abarikujunanwa bangire kusindikwa aha rumanda omuri Masindi barikutiina ngu abantu b’omu disiturikiti egi babaasa kubataahirira babahisyeho akabi. 

Nabwo bashabire okusindikwa omu bihome ebiri haihi n’amaka gaabo omu disiturikiti ya Bukwo kwenda ngu abanyabuzaare baabo babaase kubareebaho.

Kasibayo ayangire okushaba kwabo arikugira ngu ti nshonga y’amaani ngu bashemeriirwe kukomerwa omu disiturikiti ei barikuzaarwamu kandi abasindikire omu kihome kya Hoima bwanyima y’omuhwezi w’omuhaababi wa gavumenti Akello kushaba ngu babe niyo bakomerwa.

Abashatu aba nibagambwa kuba baitsire Dr. Abiriga ahabiro 07/01/2024 omu maka gye omuri Kijura North, Central Divijoni omu disiturikiti eya Masindi.

Omutumbi gwe gushangirwe aha mwanya oguriho kiromita 50 kuruga omu maka gye kandi gushangirwe gutematemire aha maraka, omu mugongo n’ebicweka ebindi.

#WestUpdates