Okuterama n’okwinamira omugyenzi Dr. Abiriga omuri Masindi. Photos by Yosam Gucwaki.

N’ebya Yosam Gucwaki 

MASINDI

Omutumbi gwa Dr. Jino Abiriga, obaire nakora nka mukuru w’eby’amagara ahabwa disiturikiti eya Masindi oitsirwe aha Sande ebiro 07/01/2024 gugaruziibwe omu disiturikiti eya Masindi.

Omutumbu gwa Dr. Abiriga gutwirwe ab’ekitongore ekya Arise Funeral Directors omu mwabazyo gw’orw’okubanza shaaha nka 3 z’ekiro bwanyima y’okutwarwa ah’eirwariro erya Mulago kukora okukyebera okwetongwire.

Omutumbi gwa Abiriga gumazire ekiro ky’okubanza omu eirwariro erya Masindi. Okumwinamira n’okumusiigaho erisho ry’ahamuheru kubaire ah’eirwariro eri.

Okurugiirira ahari Puroguraamu eshohoziibwe disiturikiti eya Masindi, omutumbi gwe nigwija kwihwa ah’eirwariro rya Masindi eriizoona gutwarwe aha kitebe kikuru kya disiturikiti ya Masindi ahi kanso y’omutaano erikwija kushutama kutandika na shaaha 4 z’akasheeshe kuhisya shaaha 7 z’eihangwe.

Na bwanyima omutumbi gwa Dr. Abiriga nigwija kutwarwa omu disiturikiti ya Maracha ahi arikwija kuzikwa Orwakana ebiro 11/01/2024 omu kyaro ekya Tumvia omugomborora ya Tara.

Abiriga, nabwo abaire ari omushaho omuzaarisa ah’eirwariro erya Masindi kandi akashangwa omu kibuga kya muriraanwa afiire omu kasheeshe ka Sande n’obuhuta bw’emironda by’omusyo aha makaraka n’omu kifuba omu kyaro ekya Kijura North, Central Divijoni omuri Masindi Munisiparite.

Aharw’okubanza, abantu 4 ab’ek’emwe ey’omugyenzi Abiriga abarimu abaana, omukazi we n’omukozi w’omuka bakwatsirwe kubaasa kuhweraho Pooriisi omu kucondooza.

Okurugiirira ahari Julius Allan Hakiza, Omugambirizi wa Pooriisi ahabw’ekyanga ekya Albertine- abakwatsirwe bakomiirwe aha Pooriisi ya Masindi.

#WestUpdates