Omu kwesharingo oku, amaduuka amaingi omuri Kampala gabaire nigasiiba gakingire.

N’ebya Omushaki weitu

KAMPALA

Ekigombe ky’abashuubuzi b’omuri Kampala ekya Kampala City Traders Association (KACITA) kyemereize akeesharingo k’abashuubuzi bwanyima y’enganzi y’eihanga, Robinah Nabbanja kugambwa kuba abahandiikire nyomwebazyo arikubahamiza ngu gavumenti neija kukora ahanshonga zaabo.

Thaddeus Musoke, Mukuru w’ekigombe ekya KACITA naagira ngu baatungire ebaruha y’enganzi y’eihanga ei bahaireho abashuubuzi omu mwebazyo gwa nyomwebazyo kandi bashaziremu kwemereza akeesharingo kaabo, bakaiguraho amaduuka gaabo eriizooba ebiro 02.08.2024. 

Eki kizireho bwanyima y’orukiiko orubaire aha ofiisi y’enganzi y’eihanga omuri Kampala orwetabirwemu bakama b’ebyombeko ebi abashuubuzi barikukoreramu, abakuru omu by’okwerinda, omutonganirizi wa gavumenti, Mukuru w’ekitongore ekya KCCA, Dorothy Kisaka n’abandi.

Musoke nashoborora ngu babaire nibenda obuhame bw’okworeka ngu Purezidenti ayehiireyo kukora aha nshonga zaabo arikwongyeraho ngu Purezidenti naija kubuganaho abashuubuzi omu kwezi oku okwa 8, 2024.

Aharwakashatu rwa wiiki egi, abashuubuzi bagarukiremu akeesharingo kaabo barikuhakanisa enkora y’okurundaana omushoro omushoro ogwa EFRIS, okubataho omushoro mwingi n’abashuubuzi b’omu mahanga g’aheeru kutaahataaha omu bizinesi zaabo n’ezindi nshonga. 

Omu kwesharingo oku, amaduuka amaingi omuri Kampala gabaire nigasiiba gakingire.

#WestUpdates