Abeebembezi b’abashuubuzi bagizireho orukiiko na Purezidenti Yoweri Museveni nyomwebazyo ebiro 18.06.2024 aha maka g’obwa Purezidenti, Entebbe. PPU Photos.

N’ebya Beth Akatukunda

Orukiiko oru Purezidenti Yoweri Kaguta Museveni abaire naaza kugiraho n’abashuubuzi b’omu rurembo ahabiro 20.06.2024 rwongyeziibweyo.

Ebi byatwirwe bwanyima y’abeebembezi b’abashuubuzi kugiraho orukiiko na Purezidenti Yoweri Museveni nyomwebazyo ebiro 18.06.2024 aha maka g’obwa Purezidenti, Entebbe.

Purezidenti Museveni abugaineho abeebembezi b'abashuubuzi b'omuri Kampala aha maka g'obwa Purezidenti, Entebbe aharwakabiri ebiro 18.06.2024.

Mukuru w’ekigombe ky’abashuubuzi b’omuri Kampala ekya Kampala City Traders Association (KACITA), Dr. Thadeus Musoke hamwe na John Kabanda, mukuru w’ekigombe ky’abashuubuzi omu Uganda ekya Federation of Uganda’s Traders Associations (FUTA) omu kihandiiko ky’amakwatane nibagira ngu baikiriziine na Purezidenti Museveni kwongyerayo orukiiko orubaire niruza kubaho Orwakana ebiro 20.06.2024 aha kishaayi kya Kololo kuhisya ebiro 31.06.2024.

Omu bwire obu, embaju zombi nizeija kuba nizikukora okucondooza kurikumara aha nshonga egi kwenda ngu babaase kutaho oburyo bw’okumaraho obuteikirizana bw’abashuubuzi ahankora y’ekitongore kya Uganda Revenue Authority ensya ey’okurundaana omushoro eya Electronic Fiscal Receipting and Invoicing Solution (EFRIS). 

Purezidenti akabanza kubuganaho abashuubuzi aba omu rukiiko rwa boona aha kishaayi Kololo aha biro 07.05.2024 ahi baheeriireyo ebizibu ebi barikubugana baaba nibakora emirimo yaabo y’eby’obushuubuzi.

#WestUpdates
#RadioWestAt25