Akakiiko aka UCC kakinga za Reediyo 6 ahabwa License.

N’ebya Dallen Namugga

Akakiiko akarikujunanizibwa ahaby’empurizana omu Uganda ekya Uganda Communication Commission (UCC) kashohoza ekihandiiko kirikuragiira okukingwa kwaza Reediyo 6 ezitwire nizikora zitaine license.

Okurugiirira aha kihandiiko ekyashohozibwa eriizooba Orw’okubanza, akakiiko kashohoza orukaara rwaza Reediyo 6 eziine kwemereza emirimo yaazo ahabw’obutagira License.

 “Eki n’ekihandiiko ky’okukinga ekirikuza ahari bakama baaza Reediyo ahabw’okuremwa kutunga License kuruga omu kakiiko erikubaikiriza kukora, Okurugiirira aha kihandiiko ky’akakiiko aka UCC.

Za Reediyo 6 ezi zirimu; 90.6 FM Divine omuri Apac, 101.6 Hot FM omuri Amolator, 91.1 Kisoro FM erikushangwa omuri Kisoro, 102.2 Iraka Ry’entunguka FM omuri Ruhiira, 93.7 Peace FM omuri Kitgum na 98.5 Clouds FM erikushangwa omuri Fort Portal.

“Okurugiirira aha kacweka ka 26 akashororongo k’okubanza omu kiragiro ekya UCC, tihaine muntu weena nainga kampuni erikwija kwikirizibwa kukora ataine license erikuheebwa akakiiko. 

Omwaka oguhwaire, akakiiko aka UCC kakakinga za Reediyo 24 ezaashangirwe nizikora omu buhenda biragiro omu muhingo ogwakozirwe omu kwezi kwa 6 n’okwa 7 omu mwaka gwa 2022 ogwakozirwe akakiiko aka UCC.

#WestUpdates