RDC wa Mbarara, ari omurukiiko rw'eby'okwerinda ahagomborora ya Rubaya nyomwebazyo ebiro 06.06.2024. PHOTO: Aidan Bataringaya

Aidan Bataringaya, Mbarara.

Ekitongore ekirikujunaanizibwa ahaby’empurizigana omu ihanga, ekya Uganda Communications Commission, kirugireyo kandi kyashoboorora ahamurongooti gw’empurizigana ogurikushangwa omukyaro kya Rugyereera, omuruka gwa Ruhunga, egomborora ya Rubaya omu disiturikiti ya Mbarara.

Ekitongore eki kihikire ahakugamba ahamurongooti ogu bwanyima y’omuhondano ogwabeireho ebiro 21.04.2024 obu bamwe omubatuura ba Rubaya kutabukira bamwe omubeebembezi b’egomborora ya Rubaya abaabeire nibaza kurambura emirimo y’okwombeka omurongooti, ogu omuri Rugyereera, bagumize ngu tibagwineho bushoboorozi.

Kimwe ahabishushani ahi abatuura baabeire nibahondana n'abeebembezi ba Rubaya babazibiire kurambura emirimo y'okwombeka omurongooti gwa Rugyereera omukwezi kwa 4. PHOTO: Aidan Bataringaya

Omujwekyerwa wa Purezidenti ahabwa disiturikiti ya Mbarara kandi orikujunaanizibwa eby’okwerinda omu disiturikiti egi, Emmy Kateera, akazibira abebembezi b’egomborora ya Rubaya n’abandi bantu okuhika ahamurongooti ogu n’ekigyendererwa ky’okwerinda akaimukyero n’okurinda obusingye omukyanga.

Bwanyima y’enshumi nkye, abeebembezi b’egomborora ya Rubaya bakaija baagaaniiraho na abatuura nikwo kubashoboorora ku buri obujunaanizibwa bwabo kurambura emirimo y’entunguuka erikukorwa omukyanga kyabo hatariho kushoroora yaaba eri eya Gavumenti ninga ebitongore ebitari bya Gavumenti.

“Itwe hati twaba twizire kurambura omurongooti. Mutajwanzya ebintu. Kandi itwe nk’egomborora nitwenda obuheereza. Oku buraije nitubwakiira; bwaba butarikubaasa kugira oku bwatushiisha nainga bwatuteganisa,” Norah Kekimuri, omuhwezi wa ‘chairperson’ wa Rubaya nikwo yaagizire.  

Ahakugaaniira nikwo kumwe, Kansara omukazi orikujwekyera, ow’egomborora ya Rubaya aha disiturikiti ya Mbarara, Loydah Twinomujuni, arikworeka amabaruha kuruga omu UCC akamanyisa ku omurongooti gwa Rugyereera guri ogwa kabiri ahamirongooti 3 eyi yaashabire arikujwekyera okushaba kwa kanso eya Rubaya.

“Omurongooti nk’oku naagushabire, nigw’ogwo, nimugureeba. N’enamba zaagwo baazibashomera. Mbwenu eby’okuteganisa mubirekyer’aho kandi ku muraabe nimugamba ahabw’oburuuru, oburuuru tibukahikire,” nikwo Loydah yayongyeireho.

Na bwanyima RDC Kateera akaija yaahandiikira ekitongore kya Uganda Communications Commission kushoboorora abantu abaahaireyo okushaba kwabo kutunga omurongooti oguri omuri Rugyereera kubaasa kwihaho obutaikirizana.

Ebaruha ei RDC Emmy Kateera yaahandikiire ekirongore kya UCC arikusherura okushoboorokyerwa ahaby'okushaba omurongooti gwa Rugyereera. PHOTO: Aidan Bataringaya

Ebiro 27.05.2024, UCC bakahandiikira RDC wa Mbarara barikumugarukamu ku Loidah Twinomujuni niwe yaabashabire omurongooti ogu.

Ebaruha kuruga omukitongore kya Uganda Communications Commission erikushoboorora ahakushaba oku baatungire okw'ekyetengo ky'omurongooti omukyaro kya Rugyereera, Rubaya. PHOTO: Aidan Bataringaya

Omurukiiko rw’eby’okwerinda orubaire ahagomborora ya Rubaya nyomwabazyo ebiro 06.06.2024, RDC ahamize ku atungire amazima kandi ku hataine muhondano gwona ogurikwija kugaruka kubaho ahabw’omurongooti ogu. 

#WestUpdates
#RadioWestAt25