Beitu hoona, Atuhura akahakanisa ebi Kasande abaire naagamba arikugira ngu ebintu byona akabihayo omu bwire. Photo by Peter Abaanabasazi.

N’ebya Peter Abaanabasazi

Hoima

Ceeyamaani w’akakiiko k’eby’oburuuru, Simon Mugenyi Byabakama, abiingire okushaba okuhairweyo Suzan Atuhura arikuhakanisa eky’akakiiko kubura kumuhandiika kwesimba omu karuuru k’okugarukamu kutoorana ceeyamaani wa disiturikiti eya Hoima.

Atuhura akahandiikira akakiiko bwanyima y’orikukurira eby’okuteeza akaruuru omuri Hoima, Merambel Kasande kubura kumuhandiika nk’otaine kigombe aha biro 31/08/2023. 

Kasande najunaana Atuhura ahabw’okuremwa kuhayo ebirikwetengwa kuza kumuhandiika omu bwire.

Okurugiirira ahari Kasande, Atuhura akareeta amaziina g’abashagiki be n’ebindi bihandiiko omuri empapura ze z’eby’obwegyese aha meeza shaaha 11 z’omwabazyo ezirikuragiirwa zahwireyo. 

Beitu hoona, Atuhura akahakanisa ebi Kasande abaire naagamba arikugira ngu ebintu byona akabihayo omu bwire.

Arikugamba aha kushaba kwa Atuhura oku ahaireyo ebiro 05/09/2023, Byabakama agizire ngu bagizireho orukiiko baganiira aha kushaba kwe barikugyendera aha kiragiro ky’akakiiko k’eby’oburuuru.

Byabakama agizire ngu omu rukiiko rwabo, bashwijumire rupoota kuruga omu kitongore ekirikukwata aha bateezi b’akaruuru hamwe na rupoota kuruga owa Kasande omu disiturikiti eya Hoima.

Okurugiirira ahari Byabakama, bwanyima y’okushwijuma, bashangire ngu kitaabaaza abaire aine empapura z’eby’obwegyese beitu akaremwa kuhayo emikono y’abarikushagika okwehandikisa kwe erikwetengwa kandi omu bwire.

#WestUpdates