Babiri bafeera omuri butandu aharwa Mbarara-Masaka.

N’ebya Beth Akatukunda

KIRUHURA

Haabaho butandu omu kasheeshe k’eriizooba aha ruguuto orwa Mbarara-Masaka omu tauni kanso ya Sanga nikwo abantu babiri kufeeramu.

Butandu egi yaaba erimu emotoka ibiri ezirimu emotoka y’amate eya Fuso eyanamba UBB 905 eyaaba neeruga Masaka hamwe n’emotoka endaijo eya FUSO ehandiikirwe omu namba ya UBG 727P eyaaba neeruga ogwa Mbarara.

Butandu egi yabaho shaaha nka 11:45 buri kusheesha eriizooba ebiro 16.08.2024.

Samson Kasasira, Omugambirizi wa Pooriisi ahabw’ekyanga ekya Rwizi yagamba abaafa nka; Eric Mugabe, 48, omutuura wa Kyazanga omu disiturikiti eya Lwengo na Gumisiriza Abubakar, kuruga omu disiturikiti eya Isingiro and aba bombi bafeeraho. 

Omuvugi w’emotoka y’amate otakamanyirwe ebirikumukwataho yaatunga obuhuta kandi yatwarwa omu eirwariro omu rurembo orwa Mbarara. 

Emitumbi y’abagyenzi yatwarwa abanyabuzaare baabo omuri Kyazanga, Pooriisi etakahikire aha mwanya.

Kasasira naagira ngu okucondooza okwahikireho nikworeka ngu butandu egi yarugiirira aha bavugi b’emotoka ezi ibiri abaaba nibavugisa ekimama.

#WestUpdates