Kasasira naagira ngu babaasize kuzoora enamba 7 z’emotoka kandi zitwirwe aha Pooriisi ya Bwizibwera ezirikwija kukoresibwa nk’ebizibiti. Courtesy Photos.

N’ebya Omushaki weitu

MBARARA

Abashaija babiri bakwatsirwe ahabw’okuteekateekwaho kuba baine akakwate n’obushuma bw’emotoka hamwe n’enamba zaazo omu disiturikiti eya Mbarara.

Abarikuteekateekwaho barimu; Asiimwe Josephat, 30, omushuubuzi kuruga Bwambala omu disiturikiti eya Rukungiri hamwe na Nakunda Javira, 34, omushuubuzi kuruga Buremba omu disiturikiti eya Kazo.

Abakwatsirwe barimu; Asiimwe Josephat, 30, kuruga Bwambala omuri Rukungiri hamwe na Nakunda Javira, 34, kuruga omu disiturikiti eya Kazo.

Nikigambwa ngu omu kiro ky’ebiro 26 na 27/11/2024 omushaaha ezitakamanyirwe, banyakuteekateekwaho bakaiba enamba ahamotoka ezabaire zipaakingire omu tauni zitari zimwe omu dsiturikiti eya Mbarara nikwo kusigaho enamba y’esimu ey’okuteera kubaheereza esente bakabona kugaruza enamba z’emotoka.

Samson Kasasira, Omugambirizi wa Pooriisi ahabw’ekyanga ekya Rwizi naagira ngu bakuraatiriize abashuma aba nikwo kubakwatira omu disiturikiti eya Rukungiri kandi bagambiire Pooriisi ahi babaire basherekire enamba z’emotoka ezi babaire baibire.

Kasasira naagira ngu babaasize kuzoora enamba 7 z’emotoka kandi zitwirwe aha Pooriisi ya Bwizibwera ezirikwija kukoresibwa nk’ebizibiti.
 
Nayongyeraho ngu abakwatsirwe nibeija kutwarwa omu kooti bajunaanwe.

#WestUpdates