Kule Jackson, Kigoma Eric na Kobugabe Oliver bari omukooti ahakucwerwa emanja zaabo omuri Kyenjojo ebiro 21.11.2023. PHOTO: FATUMAH NAGUDI

N’ebya Nagudi Fatumah
Kooti omuri Kyenjojo eyohereize abantu 3 omuri kabura-muriro kumara emyaka 3 bwanyima y’okusingisibwa emanja ezibaire niibajunaanwa; orw’okushangwa n’emibazi ya Gavumenti barikugiguza hamwe n’okutaho eduuka y’emibazi bataine rusa kuruga omu omukitongore ky’eby’emibazi ekya National Drug Authority.

Abakomirwe barimu Kule Jackson ow’emyaka 53 omutuura wa Mubuku omugomborora ya Maliba omu disitulikiti ya Kasese, Kigoma Eric ow’emyaka 37, omutuura wa Tauni Kanso ya Kyamukuba omuri Bunyangabo kandi ogu abaire nayeyeta Mushaho arikushomesa abantu obushaho omumaka gye hamwe na Kobugabe Oliver ow’emyaka 30 omutuura wa Ihamba-Nyantungo omuri Kyenjojo. Oliver ni muka Kule Jackson kandi omumaka gaabo niho emibazi ya Gavumenti eshangirwe.

Kooti eyebembeirwe omuramuzi Aciba Gloria Nimungu ehuriire ngu ahabiro 16.11.2023 omumuhiigo ogwakozirwe National Drug Authority n’ab’eby’okwerinda abarimu Poriisi na ofiisi ya RDC, bakakwata abantu aba kandi bashomeirwe emanja 9 erimu okuguza emibazi ya Gavumenti, okukora eduuka y’emibazi bataikiriziibwe, okuguza emibazi ei batashemereire kuguza n’ezindi manja ezi baikiriize.

Nikwo Kakuru Joel Akatukunda, orikukora nk’omuhababi mukuru wa Gavumenti omuri Kyenjojo kushaba Kooti kuha abantu aba ekifubiro ekibashemereire kugira ngu n’abandi abariyo nibakora emize nk’egi bakaacucukiraho.

Kakuru ayongyeire yaagira ngu Gavumenti neyefeerereza obuhumbi bw’esente kugura emibazi egi kuhwera abanya Uganda kwonka aba bagiiba, bagishohoza Congo hamwe n’okukora emirimo y’obushaho bataine bihandiiko ebirikubaikiriza ekirikuta amagara g’abantu omu kabi, 

Ahabw’obujurizi obwakwatsirwe nabwo, omuramuzi Aciba acweiremu yaafubira abantu aba arikubaha emyaka 3 omukihome kandi Kigoma Eric nakugaruka omukooti ebiro 9.01.2024 ahabw’okwehakana emishango endiijo.

Omumeezi 3 abantu 10 nibo bakwatsirwe omumuhiigo gwa NDA okusherura abarikwiba emibazi ya Gavumenti kandi ahari aba abantu 4 nibo baafubiirwe.

#WestUpdates