Butandu endiijo aharwa Jinja-Iganga efeeriiremu abantu 6.

N’ebya Doreen Musingo 

IGANGA

Abantu 6 bafiire bwanyima ya butandu ebaire erimu emotoka 3 ebaireho Orwamukaaga ebiro 04/11/2023 omu kyaro ekya Namasoga omuri Iganga ahanguuto nyeigyendwa eya Jinja-Iganga.

Emotoka ezi zirimu eya taxi ehandiikirwe omu namba ya UAV 659L, eya Isuzu Elf namba UBH 032W, hamwe n’eya Toyota Sienta ehandiikirwe omunamba ya UBJ 679Y. 

Pooriisi neegamba abagyenzi nka; Umar Gonzaga Batwawula, omutuura w’omu kyaro kya Buyembe omu disiturikiti eya Bugweri, Leokadia Nangoma kuruga Lwanda omuri disiturikiti eya Luuka hamwe na Yahaya Kinyata, 27, omutuura wa Namutumba. 

Ahitugiire kuhandiikira amakuru aga, abaana 2 n’ondiijo mukazi omwe babaire batakamanyirwe maziina.

Diana Nandawula, Omugambirizi wa Pooriisi ahabw’ekyanga ekya Busoga East ahamize amakuru aga kandi agizire ngu bamwe omu bafiire babaire bariyo nibatwarwa omu eirwariro kutunga okuragurirwa kandi abandi bafiire baheza kuhikibwa ah’eirwariro erya Iganga.

Nandawula nashobora ngu emotoka eya Isuzu ebaire eyekoriire omushenyi erikuza omu disiturikiti eya Jinja ebarukire omupiira nikwo kuruga aha ruguuto ekatomerana na taxi ebaire neeruga Jinja kandi emotoka eya Sienta nayo eizire yazitaahiramu.

Ahituhandikiire amakuru aga, emitumbi ebaire ekiri omu kabafu ah’eirwariro erya Iganga kandi emotoka ezitomeraine zitwirwe aha Pooriisi ya Iganga.

Nandawula naagira ngu ekiretsireho butandu egi n’okuvuga emotoka ebaire erimu obuzibu hamwe n’okuvugisa ekimama.

“Ninyenda kuhabura abavugi b’ebiruka obutoosha kuguma nibabanza bakyebera n’okushwijuma emotoka zaabo baza kuvuga aha ruguuto ahabw’okwenda kwerinda za butandu nk’ezi kubaho ezirikuhendera zitwire amagara g’abantu,” Nandawula arikushoborora.

Butandu egi neijaho bwanyima y’eshaaha 24 abantu 9 baherize kufeera omuri butandu endiijo ebaire aha ruguuto nirwo rumwe bwanyima y’emotoka eya taxi kutomera ekimotoka ekihango ekibaire kyemeriire.

#WestUpdates