Joshua Cheptegei, owatunga obuhuta kandi tarikuza kwetaba omu kwiruka mita 5,000.

N’ebya Javier Silas Omagor  
 
Joshua Cheptegei, osingwire emidaari 3 y’ezaabu aha rurengo rw’ensi yoona yaruga omu mpaka z’abashaija ez’okwiruka mita 5,000 omu mpaka z’okwiruka ez’ensi yoona eziriyo nizigyenda omu maisho omuri Budapest, Hungary.  
 
Cheptegei, oherize kusingura omudaara gw’ezaabu omu kwiruka mita 10,000 aha Sande yatunga obuhuta arikwetebeekanisiza empaka ez’okwiruka mita 5,000.

Arikuhamya amakuru ga Cheptegei ow’emyaka 26 kutunga obuhuta, ASP Benjamin Njia, kooki wa tiimu ya Uganda, yaagira ngu n’amazima.

ASP Njia nabwo ori omuhwezi wa Purezidenti w’ekigombe eky’abairuki omu Uganda ekya Uganda Athletics Federation yaagira ngu Cheptegei tarikwija kwetaba omu kwiruka mita 5,000.
 
Njia yakyoreka ngu obuhuta yabutunga aha kigyere kandi nikiza kumugumira kwetaba omu mpaka ezindi ez’okwiruka ahabw’omwaka ogu ogwa 2023.

Ogu n’omurundi gwa kabiri Cheptegei atarikuhendera empaka z’emirundi 2 eza mita 10,000 n’eza 5,000 aha mpaka z’okwiruka ez’ensi yoona atatungire buhuta bw’amaani.

Omu mpaka z’ensi yoona ezihererukire kubaho omuri Eugene, Oregon omuri America, Cheptegei nabwo akahenderera omu mwanya gwa 9 omu mpaka z’ahamuheru ez’okwiruka mita 5,000 kandi akagira ngu akaba aine obuhuta.

#WestUpdates