Eng. Silver Mugisha yaagaruka yatooranwa kukurira NWSC

Eng. Silver Mugisha yaagaruka yatooranwa kukurira NWSC 

N’ebya Kellen Owente                              

Eng. Silver Mugisha yaagaruka yaatooranwa kukurira ekitongore ky’amaizi ekya National Water and Sewerage Corporation (NWSC) kumara emyaka 5.

Okutooranwa kwe kwarangiriirwa Eng. Dr Badru Kiggundu, boodi ceyamaani wa NWSC obu yaaba nagambaho n’abanyamakuru omuri Bugolobi eriizooba.

Kiggundu yaagira ngu nka boodi, bacweiremu kugaruka kutoorana Mugisha kukurira ekitongore eki kwiha 2023-2028 ahabw’omurimo murungi ogu atwaire nakora n’obweebembezi burungi.

Sarah Onyiru, ori memba wa boodi aha NWSC yaagira ngu ahansi y’obweebembezi bwa Mugisha, ekitongore kibaasiize kuhitsya amaka miriyooni 18 amaizi ga paipu kuruga aha miriyooni 4.5.
 
“Eki nikimanyisa ngu abanya Uganda abaingi nibatunga amaizi marungi g’amayonjo, eki twabaire tutakakozire omumyaka 10. Twine amatsiko ngu encwamu yeitu ni nungi ahabw’ekitongore n’eihanga,” Onyiru arikugamba.
Eng. Mugisha yaasiima boodi ahabw’okugaruka kumutoorana kandi yaagira ngu ekigyendererwa kye n’okureeba ngu buri munya Uganda natunga amaizi marungi g’amayonjo bwaza kuhika 2028.

Eng. Mugisha akatooranwa kukurira NWSC Okwamunaana 2013.

Ebirikumukwataho
Dr. Mugisha aine PHD omu ‘Engineering and Economics’ ahari Makerere University.

Ogu akakuriraho eby’entunguuka n’obuheereza obw’aheeru omu NWSC. Atweire nakora n’ekitongore eki kwiha 1994 kandi atwaire natunguurwa.

Akoozireho n’ebitongore by’aheeru omu Uganda, Kenya, Tanzania, Zambia, Nigeria, Ethiopia n’agandi mahanga.

Ogu hoona niwe ceyamaani w’akakiiko k’eby’esente aha boodi ya NSSF kwiha Okwamwenda 2021 kuhitsya n’eriizooba.

#WestUpdates