Gavumenti eragiirwe kushashura Sh100m ahabw’okwita abantu 2 omubuhenda biragiro.

N’ebya Omushaki weitu

Kooti y’enshonga z’obugabe bw’abantu eya Uganda Human Rights Tribunal eragiire gavumenti okushashura Shiringi 100,000,000 (Sh100m) ahabw’eki eyetsire okwita abantu 2 omu buhenda biragiro omu disiturikiti eya Kasese na Bundibugyo.

Kooti etandiikire okuhurira emishango 18 omuri Fort Portal nyomwebazyo, eragiire gavumenti okukita Johnson Rukara Shiringi 50,000,000 (Sh50m) ahabw’okufa kw’omutabani Muhindo Asaph Oyet.

Kooti nabwo ehuriire ngu ahu yafeereire, Oyet owabaire ari Omuserukare wa UPDF akateerwa amasasi bwanyima y’okugambwa kuba yatoorokire omu kihome ahari Hima Barracks omu mwaka gwa 2010.

Pvte. Oyet akaba akomirwe ahabw’okugambwa kuba yabaire nayeyeta eki atari bwanyima y’okushangwa ajwire enyota zitari ze.

Kooti egi ebaire ekuriirwe komishona Mariam Wangadya ecwiiremu ngu okuteera Pvte. Oyet amasasi agamwitiireho kikaba kigweriire kimwe kandi kukaba kuri okuribatiirira obugabe bwe.

Ebyo bikiri aho, kooti niyo emwe eragiire gavumenti okushashura Muheesi Sylvester Biduku owajunaanire omuserukare wa UPDF okuteera amasasi mwine-nyina Bwambale Muheesi agamwitiireho.

Bwambale n’omutuura wa Mukererwa omu disiturikiti eya Bundibugyo.

Kooti eragiire ngu Muheesi Sylvester Biduku ashashurwe Shiringi 50,000,000 (Sh59m) ahabw’omushango ogu.

Nikigambwa ngu Bwambale akateerwa amasasi omu kifuba obwo arikuteerwa guruupu y’abaserukare ba UPDF ababaire bagiire kumuwata omu makagye barikumutura okutooroka omu mahe.

#WestUpdates