Minisita w'eby'amataka, Judith Nabakooba naagira ngu gavumenti neija kuzibira okwombeka amaju mahanga omundembo. Photo by Simon Tumwine.

N’ebya Simon Tumwine

Gavumenti eriyo nekora aha miringo erikwija kuba nezibira okwombeka ebyombeko bihango bitari bimwe bya kanyina omundembo zoona omuri na Kampala.

Minisita w’eby’amataka, Judith Nabakooba nakyoreka ngu nk’oku eitaka ritarikweyongyera kandi abantu barikuguma nibeyongyera obwingi n’emyanya y’etauni kukura, gavumenti eshaziremu kutandika kuhabura abantu kwombeka ebyombeko ebya kanyina.

Nabakooba naagira ngu baine n’enteekateeka ey’okwija kugaita ebyaro ebimwe ebiri omu myanya y’eebyaro kubaita ahari ‘settlement zones’ kwenda ngu babaase kutunga obuheereza burungi bw’amaizi, amashanyarazi n’obundi buheereza.

Naagira ngu eki nikija kureetera habaho eitaka kukoreraho purogyekiti z’entaasya eziraahwere eihanga eri kutunguuka.

Okurugiirira aha kucondooza kw’ekitongore ekya Uganda Bureau of Statists (UBOS) okwakozirwe omu mwaka gwa 2020, Uganda netebeerezibwa kwija kuba eine abantu miriyooni 75 omwaka gwa 2040 gwaza kuhika kandi ebe eine abanya-Uganda miriyooni 100 omwaka gwa 2060 gwaza kuhika. 

Minisita naagira ngu eki nikija kureetera abantu bagumirwa kutunguura aha miturire yaabo n’okubura obutuuro ahabw’eitaka kugira ngu tirikweyongyera.

#WestUpdates