Minisita w'eby'amataka, Judith Nabakooba.

N’ebya Umaru Kashaka    

MBARARA

Gavumenti neyokwija kuheereza ebyapa by’amataka ebya Freehold 12,644 aha batuura b’omuri Biharwe na Nyakayojo omu rurembo orwa Mbarara.

Eki kigyenderiire kubahwera obutabingwa aha mataka ago n’okutunguura emiturire yaabo.

Abarikuza kutunga ebyapa ebi nibaruga omu woodi eza; Bugashe, Kichwamba, Rwakishakizi na Katojo erikushangwa omuri Mbarara city south hamwe na woodi ya Nyabuhaama n’eya Rwenjeru omuri Mbarara City North.

Ceeyamaani w’akakiiko k’amataka omu rurembo orwa Mbarara, Francis Barabanawe naagira ngu barikukoragana na minisiture y’eby’amataka, babaasize kuhamya okushaba kw’abatuura okwebyapa ebi ahansi ya puroguraamu eya Systematic Land Adjudication and Certification (SLAAC).

“Ebyapa 801 ebya freehold nibyo byaheerize kuheebwa bakama babyo. Twine amatsiko ngu puroguraamu egi terikwija kugasira abaratungye ebyapa bonka beitu neija n’okutunguura aha miturire yaabo kurabira omukutunga za looni omuri za banka barikukoresa ebyapa ebi nk’omusingo,” Barabanawe arikugambira Meeya w’orurembo rwa Mbarara Robert Mugabe Kakyebezi.

Barabanawe naagira ngu enteebekanisa egi neteekateekwa kwongyera eby’obushuubuzi n’amakorero hamwe n’entunguuka omu rurembo.

Naagira ngu abarikuza kutunga ebyapa ebi nibaija kubitunga ahamuheeru gwa SLAAC purogyekiti, enteebekanisa eyatandikirweho gavumenti ya Uganda kurabira omu minisiture y’eby’amataka n’obushagiki kuruga omu Banka y’ensi yoona.

#WestUpdates