Nabakooba nawe ayegaitsire ahari Muka Mukuru w’eihanga kutaabarusya eishomero eri ahabw’okutunga ebyombeko bisya eby’omutindo. Photos by PPU.

N’ebya Umaru Kashaka 

MASAKA

Muka mukuru w’eihanga kandi minisita w’eby’obwegyese n’emizaano, Janet Kataaha Museveni asiimire Biishopu wa Dayosiisi ya Masaka, Serverus Jjumba, ahabw’okutunguura eby’obwegyese omu kicweka kye.

“Gavumenti nesiima enkwatanisa ei eine n’ekereziya. Nikirungi obutoosha kumanya n’okusiima omuganda gwawe omu kutunguura eby’obwegyese n’obundi buheereza obu orikuhisya aha bantu,” Kataaha arikushoborora.

Agambire ebi aharwakana ebiro 19/10/2023 obu abaire nayiguraho ekyombeka kya shiringi biriyooni 9 ah’eishomero erya St. Charles Lwanga Namabaale Primary School omu gomborora eya Ndagwe omu disiturikiti eya Lwengo.

Ekyombeko eki kyombekirwe ab’ekitongore ekitari kya gavumenti eky’omuri Australia ekya Cotton On Foundation ekirikushagika eby’obwegyese, eby’obuhangwa n’endwara z’omutwe.

Omu butumwa bwe obumushomiirwe minisita w’eby’amataka, Judith Nabakooba, Muka Mukuru w’eihanga asiimire Jjumba ahabw’okuhayo eitaka ry’okwombeka eishomero erisya.

Minisita w'eby'amataka, Judith Nabakooba arikuramusya abakuru omu kitongore ekya Cotton On Foundation eky'omuri Australia.

Naagira ngu okutunguura eby’obwegyese n’obujunanizibwa bwa buri muntu kandi ngu ekereziya eine omwoga muhango ogu erikukora omu kureeba eby’obwegyese byatunguuka kubaasa kuhwera abeegi boona kuganyirwamu.

Janet Kataaha ahaireyo shiringi miriyooni 50 ah’eishomero eri ahi Nakabooka azikwasize manegya w’ekitongore eki Cotton on Foundation, Claire Najjemba.

Omu bigambo bye, Jjumba asiimire gavumenti ahabw’okuta omukono ahandagaano n’ekitongore ekya Cotton On Foundation okwikiriza purogyekiti zaakyo z’entunguuka omu kyanga ekya Masaka empango.

Nabakooba nawe ayegaitsire ahari Muka Mukuru w’eihanga kutaabarusya eishomero eri ahabw’okutunga ebyombeko bisya eby’omutindo.

#WestUpdates