Enganzi y’eihanga, Robinah Nabbanja naagira ngu gavumenti neronda shiringi Sh60bn z'okureeberera kasasiro omuri Kampala.

N’ebya Prossy Nandudu

Gavumenti eri omu magingo g’aha muheru kutunga looni ya shiringi 60,000,000,000 (60 billion shillings) kubaasa kumaraho ekizibu kya kasasiro omu rurembo Kampala. Ebi bigambirwe enganzi y’eihanga, Robinah Nabbanja.

Nabbanja agambire ebi obu abaire nashoborora aha ki gavumenti eriyo nekora bwanyima y’ekigwererezi ekigweriire abantu ba Kiteezi ahi emituumo ya kasasiro ebandaamiriire amaju g’abantu hakafeeramu abantu barikurenga 20, amatungo n’ebintu by’abantu bikasisikara.

Nabbanja agambire ebi Orw’okubanza ebiro 12.08.2024, obu abaire ari omu puroguraamu ya Akabbinkano ahari Bukedde TV arikushoborora aha bi gavumenti eriyo nekora ahabw’ekibaire Kiteezi omu disiturikiti eya Wakiso.

Nabbanja, obaire ashendekyereziibwe minisita w’eihanga ow’ebigwererezi, agizire ngi looni egi ekabanza kushabwa ekitongore ekya Kampala Capital City Authority omu mwaka gwa 2021 beitu ahabw’ebizibu bitari bimwe, looni egi terarabiremu arikwongyeraho ngu ebizibu ebyabaire bigiremiise bikaakorwaho kandi omu bwire butari bwa hare, esente ezi nizeija kuheebwa gavumenti.

Obu tutakatungire esente ezi, Nabbanja agizire ngu ebiganiiro ahagati ya gavumenti n’abeebembezi kuruga omu disiturikiti eya Mukono na Wakiso nibigumizamu kutaho enteebekanisa ez’akanyabwanya ez’okukora aha nshonga ya kasasiro.

Okurugiirira ahari Loodi Meeya wa Kampala, Elias Lukwago- abatuura b’omuri Kampala nibarundaana tonnes 2,500 za kasasiro burizooba, kandi nashaba kuhateebwaho enteebekanisa z’ahon’aho kwerinda ebizibu nk’ebyo.

Aha rubaju rwe, omuny’ishengyero w’ekicweko ekyo, Muwada Nkunyingi nashaba kuhabaho okurahusya omu kucondooza kumanya ekirugiirireho okutenguka kwa kasasiro okwabaireho omu kasheeshe k’orwamukaaga.

Okushagika amaka agateeganisiibwe, Purezidenti Museveni ahaireyo shiringi 5,000,000 ahari buri ka efeereirwe abantu baabo kubahweraho okuteebekanisa eby’okuziika na shiringi 1,000,000 ahabw’abatungire obuhuta kubahweraho kutunga okuragurirwa. 

Beitu hoona, bamwe omu batungire obuhuta nibagira shiringi 1,000,000 n’esente nkye kubaraguriza kuhika aha kukira n’okwebisaho ngu ahabw’okuba ebintu byabo byona bikashwekwa kasasiro.

Okuronda abantu bantu abakubaasa kuba bakibandaamiriirwe kasasiro kuriyo nikugyenda omu maisho.

#WestUpdates