Enjura y’eihunga ecwekyereize ebintu omuri Ntoroko

Enjura y’eihunga ecwekyereize ebintu omuri Ntoroko

N’ebya Rogers Sunday

Enjura y’amaani ebaire erimu omuyaga n’eihunga egwire akasheeshe ka nyomwabazyo ecwekyereize ebyaro omugomborora ya Karugutu omu disiturikiti ya Ntoroko.

Ebyaro ebikirizeyo kuteganisibwa harimu Karambi, Itojo, Kakindo, Kanyangeya na Karugutu ahi emisiri nyamwingi esisikaire n’amaju gacwekyerera.

Abatuura abu amaju gaabo gasiisikaire obwahati bahungiire ow’abanyabuzaare omubyaro ebindi. 
Zakayo Zehimbisa, omutuura kuruga Itojo naagira ngu ogu n’omurundi gw’okubanza ekyanga kyabo kuteganisibwa ekigwereerezi eki.

Hariho okwerarikiriira ngu disiturikiti yoona ebaasa kuteerwa enjaara ahabw’okuba ebyokurya bitwire nibiruga omuri Karugutu. Beitu ab’obushoboororzi batandikire okushwijuma ebintu ebisiisirwe.

Ceyamaani wa disiturikiti ya Ntoroko, Williams Kasoro yaagira ngu ekigwereerezi eki kiretsirweho empinduka omubwire hamwe n’obutagatsi bw’ensi kweyongyera.

Ogu najunaana abantu abarikutuura aharushozi rwa Rwenzori kutema emiti etwaire netanga omuyaga obwo barikwotsya amakara.

Ogu yashaba gavumenti n’ebitongore ebirikurinda eby’obuhangwa kukwatanisa na disiturikiti kugaruzaho eby’obuhangwa hamwe n’okuhwera amaka agateganisibwe.

#WestUpdates