Thomas Kwoyelo oshangirwe arikusingwa emanja 44. PHOTO: The New Vision

N'ebya Jesse Johnson James na Chrsitopher Nyeko

Thomas Kwoyelo ashangirwe arikusingwa emanja 44 obu abaire naahozesibwa abaramuzi 4 kuruga omu kooti y’ensi yoona omu kooti eshutamire omumbuga za kooti enkuru omuri Gulu nyomwebazyo Orwakabiri ebiro 13.08.2024.

Kwoyelo owaabeireho kamanda w’abaheekyera abaabeire nibebemberwa Joseph Kony aba Lord’s Resistance Army ateirweho emanja zirikuhika 78 ezirimu obwitsi, okuhamba abantu okw’omubonano, okugyemesereza abantu kuza omubuheekyera barikubabuzaho, ebikorwa bibi, okutwariza kubi abantu, obushuma, okunyaga ebintu by’abantu n’endiijo mishango.

Emishango ei kitabaarizibwa arikugambwaho kuba yaakozire ahagati y’omwaka gwa 1994 na 2005 omubyanga ebya; egomborora ya Pabbo omu disiturikiti ya Amuru, nehenda bimwe ahabiragiro by’engyenderwaho y’ekiragiro eky’ensi yoona. 

Omubugufu bw’encwamu ya kooti  ekoreirwe omumaisho ga kitabaarizibwa, abahooreereza be, ba kitabaaza hamwe n’abahuumuriza b’abaakozirweho emishango egi bashangire nasingwa emanja 44, baamwihaho 3 kandi 31 baagibinga. 

Omuramuzi Michael Elubu, oshomire encwamu omubugufu arikujwekyera n’abandi baramuzi ababeire nibahozesa- Duncan Gaswaga, Stephen Mubiru, na Andrew K. Basaija – asiimire  buri omwe weena obaire naakwatwaho omumanja ezi.

William Biancy, omuhwezi wa w’omuhababi wa Gavumenti ashabire kooti kuha wiiki ba kitabaaza, abahoreereza hamwe n’abu emanja ezi zaakozirwe kwetebeekanisiza ekifubiro eki Kwoyelo ashemereire kuheebwa.

Okurugiirira ahari Biancy, embaju 3 ezi niziija kukoresaho wiiki 2 buri rubaju.
Ebyo bikiri aho, Caleb Alaka, omuhoreereza ashabire kooti ku eragiira disiturikiti kukora rupoota ahari kitabaarizibwa, kuragiira ekitongore ky’ebihome kuha ripoota ahanyetwaza ya kitabaarizibwa omubwire obu amazire akwatsirwe omwaka oguhwaire kandi eheereze n’orusa orukwikiriza kuhayo ekihandiiko eki arikurahiriraho  eky’embeera zoona ezeetooroire omushango ogu na kitabaarizibwa. 

Omuramuzi Elubu hoona nabwo agambeire kooti ngu ebihandiiko enirikushoboorora encwamu zoona nibiija kuheebwa boona abarikukwatwaho omumushango ogu ai buraaze kuhikira Orwakataano ebiro 16.08.2024 batakagarukire omu kooti kumanya embeera ei omushango gurimu.

Kwoyelo n’oha?

Kwoyelo, 49, ni mutabani w’omugyenzi Jokodino Omona Opoto-tap na Joselina Oyella.
Akazaarwa na baine-nyina 11 (aboojo 5 n’abaishiki 6). Aboojo 3 n’abaishiki 2 bakafa.

Ahamyaka 13, Kwoyelo akakwatwa abaheekyera ba Kony aba Lord’s Resistance Army omugwa 1987 obu yaabeire ariyo naatambura arikuruga ah’ishomero rya Pabbo Girls Primary School omu disiturikiti ya Amuru
#WestUpdates