Omuserukare Denis Otto Ochola orikujunaanwa..(Photo by Douglas Mubiru)

Kooti y’ekinyamahe yakyendeza ahamyaka y’okukoma omuserukare owaitsire omweegi

N’ebya Douglas Mubiru

Kooti y’ekinyamahe yakyendeeza emyaka y’okukoma omuserukare wa UPDF owabaire akoomirwe emyaka 12 kuza ahamyaka 7.

Private Denis Otto Ochola (RA/194594) akasingisiibwa omushango gw’obwitsi omukwakataano 2022 kooti y’amahe omu disiturikiti ya Gulu.

Ochola nagambwa kuba yateeire amasasi akaita Gabriel Rwotomiya, 17, omweegi wa S.3 ah’eishomero erya Gulu Central High School ahabiro 6/3/2022.

Ogu taramaziirwe n’encwamu ya kooti nikwo kurabira omu puriida we, Elizabeth Nyasingwa nikwo kutwara okushaba kwabo omumaisho ga Kooti enkuru ey’ekinyamahe omuri Makindye, Kampala.

Eriizooba, Ceeyamaani wa kooti enkuru ey’ekinyamahe, Brig. Gen. Robert Freeman Mugabe yaahayo encwamu ye ahakushaba oku.

Mugabe yacwamu ngu Otto aheeze emyaka 7 omu kihome. Kandi ogu aine obugabe bw’okuhakanisa encwamu egi omu biro 14.

Ahabiro 6/3/2022, ab’eby’okwerinda bakateebwa ah’eishomero erya Gulu Central High School omuri Bardege-Layibi omu rurembo orwa Gulu kubaasa kutatanisa abeegi ababaire besharingire.

Abeegi aba bakaba nibediima ahabw’encwamu ya bakuru b’eishomero obutooreka omupiira gwa Manchester United na Manchester City.

Omukurwana oku, abeegi bakatambikira amabare ab’eby’okwerinda, ekyabagyemesereize okuteera amasasi omumwanya.

Aho niho Rwotomiya, owabaire ayesherekire omu muti, yateereirwe eisasi omu rukiizi, akajwa munonga akafa.

#WestUpdates