Muka Purezidenti kandi Minisita w'eby'obwegyese n'emizaano, Hon Janet Museveni arikushohoza omutongore ebirugire omubigyezo bya PLE 2024 aha State House, Naksero eriizooba. Photo: Miriam Namutebi

N’eby’omushaki Waitu

Abeegi 8 omukihome kya Luzira, Kampala, hamwe n’ekihome ekya Mbarara bahikire ebibuuzo bya 2024 eby’ekyamushanju barikwizira omu idaara ry’okubanza. 
Aba Uganda National Examinations Board (UNEB) nibagira ngu abeegi 71 nibo baayehandikiise ah’ishomero ery’ebihome bya Uganda (Uganda Government Upper Prison School, Luzira. Omwaka ogu heyongyeireho embohe 2 waagyera-gyeranisa n’omwaka 2023. 

“Ahabeegi 71 abaayehandikiise, 59 nibo baashutamiire ebigyezo ebi. 4 baiziire omu idaara ry’okubanza, 36 baiziire omu idaara rya 2, 13 baiziire omu idaara rya 3 kandi 4 baayizira omu idaara rya 4. Tuhaine mwegi otatungire rurengo,” UNEB nikwo barikugira. 

Omuhandiiki mukuru wa UNEB, Dan Odongo eriizooba ebiro 23.01.2025 yaamurikira Minisita w’eby’obwegyese n’emizaano, Hon Janet Museveni ebirugire omubigyezo omumaka g’obwa Purezidenti ag’omuri Nakasero omururembo Kampala.  

Mbarara
Okurugiirira ahari Odongo, ah’ishomero rya purayimare ery’ekihome, Mbarara Main Prison Inmates Primary School, abeegi 37 nibo baayehandikiise kandi boona bakashutamira ebigyezo. 

Omuri abo, 4 baiziire omu idaara ry’okubanza , 20 baayizira omu idaara rya 2, 10n baayizira omu idaara rya 3 kandi 4 baizira omu idaara rya 4. Tihaine abatatungire rurengo kandi boona babaire bari aboojo,” nikwo Odongo yaagira.