Mukuru w’eishomero akwateirwe okutweka omwegi wa S.1

N’ebya Charles Etukuri

KASSANDA

Pooriisi neegira ngu bakwatsire mukuru w’eishomero, Jonathan Ssekayombya, 34, ahabw’okugambwa kuba atooroboize kandi akatweka enda omwegi wa S.1.

Omugambirizi wa Pooriisi ahabw’ekyanga ekya Wamala, Racheal Kawala aharwakashatu ebiro 28/02/2024 naagira ngu Ssekayombya obaire ari mukuru w’eishomero erya Brain Star Senior Secondary School kandi omutuura w’omu tauni ya Wakayiba omugomborora eya Kalwana omu disiturikiti eya Kassanda. 

Okurugiirira ahari Kawala, mukuru w’eishomero eri naagambwa kuba yaakozire omushango ogu omu kwezi kwa 8, 2023.

“Pooriisi omuri Kassanda ekwatsire Ssekayombya. Omwegi n’ow’emyaka 17 kandi abaire nashomera ah’eishomero niryo rimwe. Okucondooza okwahikireho nikworeka ngu omwegi ogu akaba ari owa S.1 ah’eishomero erya Brain Star Secondary School beitu akaija yaruga omu eishomero bwanyima ya mukuru w’eishomero eri kugambwa kuba yamutooroboize akamutweka omu kwezi kwa 8, 2023. Obwa hati omwishiki ogu natuura na nyina,” Kawala arikushoborora.

Kawala nayongyeraho ngu ahabiro 02/02/2023, Pooriisi ya Kassanda etungire okumanyisibwa kuruga omu batuura abakwatsirweho aha kikorwa eki kandi eshabire aba Pooriisi baayo kuza kutaayaayira amaka ago aho n’aho.

“Omwishiki ashangirwe aine enda ekuzire kandi omushango gw’okutooroboza gwigwirweho aha Pooriisi ya Kassanda aha namba ya CRB. 151/2024.Omwishiki ogu nabwo akaheebwa foomu ya Pooriisi kuza kukyebeza. Mukuru w’eishomero Ssekayombya akwatsirwe kandi akomiirwe aha Pooriisi ya Kassanda. Faayiro y’omushango neija kutwarwa ow’omutonganirizi wa gavumenti kusharamu ekyokukora,” Kawala arikwongyera kushoborora.

#WestUpdates