Museveni ayetsire abany’eishengyero ba NRM ahari Kisozi omuri Gomba.

N’ebya Beth Akatukunda

GOMBA: Purezidenti Yoweri Museveni ayetsire abany’eishengyero b’ekigombe ekya NRM aha faamu ye eya Kisozi omu disiturikiti eya Gomba ahagati y’okuhajaana aha kiragiro ky’omwani ekya National Coffee Amendment Bill 2024.

Okurugiirira ahari nyampara wa gavumenti Denis Obua, orukiiko oru niruza kubaho Orwakataano orwa wiiki egi ebiro 01.11.2024

N’obu ebaruha ya Purezidenti etarikugamba aha bibarikuza kugambaho omurukiiko oru, Obua naagira ngu Purezidenti hamwe n’abany’eishengyero ba NRM nibeija kugaaniira ahanshonga zitari zimwe ezirikuteganisa eihanga.

Wiiki ehwaire, Siipika wa Paramenti, Anita Among ayongiireho Paramenti kuhisya aha kiro ekindi bwanyima y’okuhajaana n’okuteera akaruuru aha kiragiro ky’omwani ekirikugamba aha kutwara ekitongore ky’omwani ekya Uganda Coffee Development Authority omu minisiture y’eby’obuhingi.

N’obu abany’eishengyero abaingi ab’ebigombe eby’orubaju oruhakani birikuhakanisa ekiteiso eki, aba NRM bashagikire eky’okutwara ekitongore ky’omwani ekya UCDA omu minisiture y’eby’obuhingi.

Akaruuru kukahwire, abany’eishengyero 77 bakahakanisa ekiteiso eky’okugaita ekitongore eki aha murundi gwa kabiri gw’okushoma ekihandiiko ky’omwani ekya National Coffee Amendment Bill 2024 kandi abany’eishengyero 159 bakishakire.

Ekitongore ekya UCDA kikatandikwaho omu mwaka gwa 1991 ahansi y’ekiragiro kya Uganda Coffee Development Authority akashororongo aka 325 ekyayihirweho kandi omu mwanya gwakyo hateebwamu ekiragiro ekya National Coffee Act No. 17 of 2021.
 
Omwoga gw’ekitongore eki gurimu okwongyera omutindo omu mwani, omutindo gw’omwani, okushagika okucondooza aha mwani n’okushagika abarikukwatwaho omu kitongore eki.

#WestUpdates