Omureeberezi wa Ankole Dioces, Fred Sheldon Mwesigwa arikushabisa ahari St. James Cathedral Ruharo eriizooba. PHOTO: ABDULKARIM SSENGENDO

N’ebya Ssengendo Abdulkarim

Omureeberezi w’obureeberezi bwa Ankole, Rt. Rev. Fred Sheldon Mwesigwa yaahiga abaikiriza omubureeberezi kuta amaisho ahakutungura amaka gaabo barikukora emirimo erikureetaho entaasya.

Bishop Sheldon Mwesigwa ahakushaba kw'okutandika omwaka 2025 ahari St. James Cathedral Ruharo Mbarara eriizooba. PHOTO: ABDULKARIM SSENGENDO

Omureeberezi beitu hoona yaabarabura n’ahakwejumba omumirimo etarikuhaisa Ruhanga ekitiinisa. Ogu, ebi yaabigamba obu yaaba nayegyesa abaikiriza abaija omukushaba ahakanisa ya St. James omu Ruharo omururembo Mbarara.

Omureeberezi yaayongyera yaamanyisa abaikiriza ngu omwaka ogu, obureeberezi bwe nibwija kuta amaani omukuhinga omwani nikwo kuhiga amaka kwakiira ehururu y’okuhinga omwani kwongyera ahantaasya yaabo. Ogu yaagira ngu obureeberezi obwa hati bwabyaire omwani aha hiika 223 ah’eitaka ry’ekanisa kandi bari omumirimo y’okutunga ekyoma ky’omwani kwejumba okwongyera ahamutindo gw’omwani.

Bamwe omubaikiriza abaaba bari omukushaba kw'okutandika omwaka gwa 2025 ahari St. James Cathedral Ruharo eriizooba. PHOTO: ABDULKARIM SSENGENDO

Biishop Sheldon hoona nabwo yaahiga eminyeto kukoresa buri Mugisha gwona ogubeehinguririize oteiremu n’eitaka nikwo batandikyeho emirimo erikubareetera entaasya kandi beetantare ebyo ebirikubasiisira obwire betaine eki birikubongyera ahamagara gaabo kandi batandikye mpora. 

Yayongyera yaagira ngu obureeberezi nibwija kuta amaani omuby’amagara na munonga omukugamba ahanshonga ezirikurugiiriramu okweyongyera kw’endwara ezitarikututirira omu ihanga. Omushaija wa Ruhanga yayongyera yaashaba abanya Uganda boona kugira obusingye n’obuteeka na munonga omubwire bw’oburuuru oburiyo nibwirira haihi.

Bamwe omubaikiriza barikuhimbisa Ruhanga ahakushaba kw'okutandika omwaka 2025 ahari St. James Cathedral Ruharo eriizooba. PHOTO: ABDULKARIM SSENGENDO

Omubutumwa bwe obundi, ogu yayongyera yasiima Rev Can. Bobs Mwesigye, omuhwezi w’omureeberezi ri St. James Cathedral n’abaikiriza boona ahabw’okushagika emirimo y’ekanisa atyo yaabahiga kweteeraho ebigyendererwa birungi bo n’amaka gaabo

#WestUpdates
#HappyNewYear