Omuhwezi wa Purezidenti w'ekigombe ky'omupiira gw'ebigyere ekya FUFA, Darius Mugoye .

N’ebya Umaru Kashaka 

Ekigombe ky’omupiira gw’ebigyere omu Uganda ekya Federation of Uganda Football Associations (FUFA) kyarangiirira okufa kw’omuhwezi wakyo wa kabiri wa Purezidenti, Darius Mugoye.

Okurugiirira ahari FUFA, Darius Mugoye yafeera ah’eirwariro erya Mulago omu kasheeshe k’eriizooba ebiro 07/11/2023.

Ahmed Hussein, Omugambirizi w’ekigombe ekya FUFA yagambira abanyamakuru ngu Mugoye atwire omu eirwariro aha kitandika arikuragurirwa endwara etakamanyirwe kumara wiiki 2.

Aha biro 04/08/2023, Mugoye akaba ari na memba w’akakiiko ka FUFA, Sam Mpiima hamwe n’omuhwezi wa mukuru wa FUFA, Decolas Kiiza ahari FUFA Technical Centre aha mukoro gw’okukinga faayinoro z’empaka za 2022/23 FUFA Juniors league ezibaire omuri Njeru omu disiturikiti eya Buikwe.

Mugoye akoriire ekigombe ekya FUFA ahansi ya Purezidenti wakyo kandi Omuny’ishengyero wa Budiope East, Moses Magogo kuruga omu mwaka gwa 2013 kandi bakatandikaho timu yaabo ensya bwanyima y’okutooranwa nk’abajwekyerwa ba FUFA omu disiturikiti eya Moroto omwaka ogu.

Siipika wa Paramenti Annita Among kandi hoona omukazi wa Magogo kworeka okushaasha ahabw’okufa kwa Mugoye.

“Darius Mugoye abaire ari omwesigwa, arikwehayo n’okukora gye omurimo gwe ou turikwija kuguma nitwijuka! Akozire omurimo muhango omu kutunguura eby’emizaano n’ebitongore by’obwegyese. Nitushaasha n’aba famire, banywani be, FUFA hamwe n’abanyamizaano mwena. Mukama amuhuumuze omu busingye,” Siipika Among arikurabira aha mukura gwe gwa X.

Ahitwaza kuhandikira amakuru aga, FUFA yaaba etakashohoize enteebekanisa z’okuziika Darius Mugoye.

#WestSports