Siipika wa Paramenti, Anita Among n'abakuru kuruga omu UPDF na FUFA obu barambura omurimo oguriyo nigukorwa aha kishaayi ekya Mandela National Stadium eshumi nkye ehwaire.

Ekigombe ekya CAF kyayikiriza Namboole kutaayaayisa emizaano ya World CUP 2026 qualifiers. N’ebya Umaru Kashaka Ekigombe ekirikukurira omupiira gw’ebigyere omuri Africa ekya Confederation of African Football (CAF) kyarugaho kyayikiriza ekishaayi kya Mandela National Stadium ekirikumanywa nk’ekya Namboole kutaayaayisa emizaano y’okutooranamu abarayetabe omu mpaka z’ekikopo ky’ensi yoona eza World Cup qualifiers ez’omwaka gwa 2026. Ekigombe ekirikukurira omupiira gw’ebigyere omu Uganda ekya FUFA kurabira aha mukura gwakyo ogwa X, eriizooba kyarangiirira amakuru aga bwanyima y’ebiro bikye, abakuru kuruga omu kigombe ekya CAF baherize kugarukamu kurambura ekishaayi eki. Ekigombe ekya FUFA kyayoreka ngu eki nikimanyisa ngu Uganda Cranes neija kutaayaayisa omuzaano ogwa 2026 Federation of International Football Association (FIFA) World Cup Qualifier oguri ahagati y’eihanga erya Botswana na Algeria omu kwezi kwa mukaaga aha kishaayi Namboole. Ekishaayi kya Namboole kirambwirwe abakuru kuruga omu kigombe ekya FIFA na CAF abaashabire ngu ekishaayi kihunduuzibwe kigire omwanya murungi gw’okuzaaniramu. Aha biro 08/05/2024, Lt. Col. Peter Seku Kidemuka kuruga omu kitongore ky’amahe ga UPDF ekya engineering brigade ekiriyo nikikora omurimo gw’okuhunduuza ekishaayi eki akarambuza insipekita omu kigombe ekya CAF ekishaayi eki. Aba begaitsirweho minisita w’eihanga ow’eby’emizaano, Peter Ogwang, hamwe n’abakuru kuruga omu kigombe ekya FUFA beebembiirwe Purezidenti waabo, Moses Magogo. Africa aha murundi ogu neyokujwekyera tiimu 9 omu faayinoro z’empaka z’ekikopo ky’ensi yoona eziraatebekanisibwe omuri Canada, Mexico hamwe na America. #WestUpdates