Omwahure w'emyaka 54 kuruga omu disiturikiti ya Arua n'omwe aha beegi ba P.7 abarikuza kukora ebigyezo bya PLE eby'omwaka ogu. Photo by Robert Adiga.

N’ebya Robert Adiga 

ARUA.

Omwahure w’emyaka 54 omuri Arua n’omwe aha beegi ba P.7 abarikuza kukora ebigyezo byabo bya PLE ebirikutandika nyencakare Orwakashatu ebiro 06.11.2024.

Rev. Rufus Amaku ow’oburiisa bwa Aya omu busabadikoni bwa Vurra aine abaana 7 kandi akaruga omu eishomero omu mwaka gwa 1990 bwanyima y’okuhendeera P.7.

Rev. Amaku akehandiikisa kukora ebigyezo bya P.7 eby’omwaka ogu ah’eishomero erya Aya Primary School.

Rev. Amaku, orikuruga omu kyaro kya Lezu omu muruka gwa Ayivu-Nyio omu gomborora ya Vurra akazaarwa ebiro 06.01.197 yaija yashomera ah’eishomero erya Lazebu Primary School kuruga 1983-1989 nikwo kuza ahari Ave Primary School ahi yamariire P.7 omu mwaka gwa 1990 kandi akihayo obubonero 21.

Beitu ahabw’okuburwa fiizi, Rev. Amaku taraabaasize kuza omu siniya okuhisya omu mwaka gwa 1997 obu yayegaita aha course y’okushoma obuburizi ah’eitendekyero erya Archdeaconry Training Centre (ATC)-Odroo omu disiturikiti eya Arua.

Bwanyima y’okumara emyaka erengire omuri 20 ari omubuheereza bwa Mukama omu makanisa gatari gamwe, arikukuzibwa n’okuheebwa ebitiinisa bitari bumwe, Amaku akaguma n’ekirooto kye eky’okureeba ngu yaaza omu siniya yashoma akihuriire.

Naagira ngu ekizibu ekihango ekyakirizeyo kumuteganisa n’okushashurira abaana be fiizi.

Ebigyezo bya P.7 ebya PLE ahabw’omwaka ogu bitandikire n’okugambira abeegi oku baine kwetwazamu baaba nibakora ebigyezo ebi (briefing) ebiro 04.11.2024 kandi nibatandika kuhandiika aha bigyezo byabo Orwakashatu ebiro 06.11.2024 n’Orwakana ebiro 07.11.2024.

#WestUpdates