Col. DR. Kiiza Besigye na mutaahi we, Hajji Obed Lutale n'ab'okwija kurira Nohiri n'omwaka musya omu kihome.

N’ebya Omushaki weitu

KAMPALA

Puriida ondaijo w’omunya-Kenya ahaireyo okushaba kwe omu kakiiko k’ebiragiro aka Uganda Law Council arikushaba kwegaita ahari ba Puriida abarikuhoreereza Col. Dr. Kiiza Besigye na mutaahi we Hajji Obed Lutale omu mushango ogubarikujunaanwa omu kooti y’ekinyamahe omuri Makindye, Kampala.

Okushaba kwa Tieme Gesheru, Puriida ow’omu kooti enkuru omuri Nairobi nikwijaho bwanyima y’akakiiko aka Uganda Law Council kwanga okushaba kwa Martha Karua nawe orikuruga omu eihanga erya Kenya ahabw’okuremwa kureeta ebirikwetengwa.

Gesheru nashoboorora ngu okushaba kwe kumanyisiibweho n’omukago gw’amahanga ga East Africa ahi Uganda eri memba.

Ebyo bikiri, Martha Karua arahiire kuhakanisa encwamu y’akakiiko aka Uganda Law Council ey’okwanga ngu ategaita ahari ba Puriida omu mushango gwa Dr. Besigye na Obed Lutale.

Nyomwebazyo Orwakabiri ebiro 10.12.2024, kooti y’ekinyamahe eya Makindye, Kampala ebaire ekuriirwe Brig. Gen. Freeman Mugabe egarukire yasindika Besigye na Lutale aha rumanda omu kihome kya Luzira kuhisya ebiro 07.01.2025, ekirikumanyisa ngu ekiro kikuru kya Nohiri n'omwaka musya nibeija kubashanga omu kihome.

Besigye na Lutale nibajunaanwa omushango gw’okushangwa n’embundu hamwe n’amasasi omu buhenda biragiro. 

Ababiri bakakwatirwa omuri Kenya okwezi okuhwire ahi babaire bagiire kutongoza ekitabo kya Martha Karua, Puriida mukuru kandi omunyabiragiro omuri Kenya.

#WestUpdates