Omwe akwateirwe okwita abantu babiri omuri Buikwe.

N’ebya Emmanuel Balukusa

BUIKWE

Okutiina n’amaganya bishwekire abatuura b’omu kyaro kya Nakusubyaki na Vumba-Busabaga omu muruka ogwa Bibbo omu divijoni ya Kawolo omu disiturikiti eya Buikwe bwanyima y’emitumbi y’abantu 2 baitsirwe kushangwa omu kisharara.

Emitumbi y’abantu aba ereebirwe abatuura b’omu kyaro kya Vumba-Busabaga omu kasheeshe ka Sande obu babaire nibaza kukora. 

Bateire enduuru erestire abatuura bayerundaanira aha mwanya ahi emitumbi egi ebaire eri.

Abaitsirwe bamanyirwe nka; Eridad Buwembo, 63, omuvugi wa boda-boda kuruga omu tauni ya Seeta omu disiturikiti ya Mukono hamwe na Musa Bogere Lugwire, ceeyamaani w’ekyaro kya Vumba-Busabaga omu muruka gwa Bibbo omu disiturikiti eya Buikwe.

Abatuura nibagira ngu ababiri aba babaasa kuba baitsirwe ekikoosi ky’abashuma ababaire bateireho ‘roadblock’ ahanguuto kwiba za piki omu bwire bw’ekiro.

Buwembo abaire navuga piki ehandiikirwe omu namba ya UFG 730P kandi we Bogere abaire navuga piki eya namba UFU 392E. Piki zombi ziibirwe.

Pooriisi erikuhwerwaho embwa yaayo enkagirizi ehikire aha mwanya nikwo kukwata omuntu omwe. Emitumbi y’abagyenzi etwirwe omu kabafu ah’eirwariro erya Kawolo kukyeberwa obwo okucondooza kurikugyenda omu maisho. 

Hussein Musiho, Orikukurira Pooriisi ya Lugazi nashaba abatuura okuhayo amakuru goona agakubaasa kurugiiriramu okukwata abainazi abaitsire abantu abo babaase kujunaanwa.

#WestUpdates