Ow’emyaka 15 akwateirwe okwita ishe- Apac

N’ebya Hudson Apunyo 

APAC

Omwojo w’emyaka 15 akomiirwe aha Pooriisi ya Apac ahabw’okugambwa kuba ateire ishe w’emyaka 52 akamwita.

Pooriisi neegira ngu omwojo ogu (owamaziina ge gatagambwa) ateire ishe, Charles Aliro, 52, shaaha nka 2 z’ekiro aharwakashatu ebiro 03/01/2024 omu maka gaabo omu kyaro ekya Otucoluk omu gomborora eya Ibuje omu disiturikiti eya Apac.

Omugambirizi wa Pooriisi ahabw’ekyanga ekya North Kyoga, Patrick Jimmy Okema, naagira ngu nyakuteekateekwaho abaire natuura omuri Kampala n’eishento, Charles Ogwal kandi abaire agiire omu kyaro kureeba aha bazaire be omu kiro kikuru.

Okema naagira ngu amakuru agahikireho nigoreka ngu aharwakashatu shaaha 2 z’ekiro, omwojo ogu ashutamire n’eishe aheeru kuganiira nikwo kuhendera bagizire obuteikirizana.

Omwojo ogu nagambwa kuba akwatsire enkoni akagiteera ishe aha mutwe n’omu kifuba, ekimureteire yaagwa kihuumura akaafa.

Ogwal muriraanwa w’omugyenzi amanyisiibwe aha nshonga egi ohikire naija akakwata omutumbi akagwiha ahi gubaire guri akagutwara omu kabafu ah’eirwariro erya Apac na bwanyima nikwo kutwara omwojo ogu (nyakuteekateekwaho) aha Pooriisi ya Apac.

Okema nakyoreka ngu omushango gw’okwita gwigwirweho aha Pooriisi ya Ibuje.

Pooriisi neegira ngu Ogwal nawe akwatsirwe kubahweraho omu kucondooza n’okubashoborora ahabw’enki arahukire kuhika aha mwanya akahika natwara omutumbi, Pooriisi etakahikireho.

Joan Apio, Omuduumizi wa Pooriisi ya Apac naagira ngu okucondooza okubahikizeho nikworeka ngu omwojo ogu aitsire ishe ahabw’okwanga kumuheereza esente.

Naagira ngu bwanyima y’ishen kwanga kumuheereza esente, omwojo ogu akwatsire enkoni yagiteera ishe omu kifuba nikwo kumwitiraho.

#WestUpdates