Purezidenti yaragiira ngu ba ceeyamaani LCI kuguma omu ofiisi.

N’ebya Beth Akatukunda

Purezidenti Yoweri Museveni yaashaba tiimu y’abanyabutegyeki ab’ahaiguru abarikukurirwa enganzi y’eihanga Robinah Nabbanja okutaho entebeekanisa z’okureeba ba ceeyamaani b’entebe z’ebyaro n’abemiruka baguma omu ntebe.

Encuro yaba ceeyamaani 81, 220 ab’entebe y’okubanza n’eya kabiri yahwayo eriizooba ebiro 10/07/2023. 

Beitu ahabw’obutagira esente z’okuteeza akaruuru akasya, ba ceeyamaani abari omu ntebe obwahati nibaija kugumizamu nibakora emirimo yaabo ahansi y’entebeekanisa ensya okurugiirira ahari Nabbanja na minisita wa gavumenti z’ebyanga, Raphael Magyezi.

Arikugambaho n’abany’ishengyero, Nabbanja yaagira tiimu y’abeebembezi bahaiguru eriyo nekora ahangyenderwaho ezi ba ceeyamaani baine kukuratira kandi nateekateekwa kwija kuba namanyisa eihanga ahaku baine kukoramu gye emirimo yaabo.

Aharwakataano, Magyezi agizire ngu Omutonganirizi wa gavumenti naija kushohoza ekiragiro n’ebindi eby’okubikiriza kukora emirimo yaabo.

Okurugiirira ahari Magyezi, Minisiture neyetenga shiringii biriyooni 59 z’okuteeza akaruuru kaba ceeyamaani beitu minisiture y’eby’esente negira ngu teine sente.

Ba ceeyamaani abari omuntebe hati bakateererwa akaruuru omu mwaka gwa 2018 bwanyima y’emyaka 17 ei akaruuru ako kabaire kaheereruka kuteerwa.

#WestUpdates