Ekigwererezi kikateera ebyaro ebirimu Mandwiga, Wairaganza, Nyafunjo, Rwemiseke na Kasungwa. PHOTOs by Peter Abaanabasazi.

N’ebya Peter Abaanabasazi

KIKUUBE

Mukuru w’entebe ya 5 ahabwa disiturikiti ya Kikuube naagira ngu tibaine sente z’okuhwera amaka garikurenga omuri 300 agu emisiri n’amaka gaabo byacwekyereziibwe orubaare rw’amaani okwezi okuhwaire

Banura, owaabeire nagamba ahakwetomboitwa kw’abatuura ahakuremwa kw’abebembezi ba disiturikiti kukora ahakubonabona kwabo, aharwakabiri ebiro 14.05.2024, agizire ngu disiturikiti teyine mbariirira y’okuhwera abo boona abaateirwe ekigwererezi.

Enjura y’amaani erimu eihunga, ekateera ebyaro 7 eby’omugomborora ya Kyangwali omukwezi kwa 4 nikwo kusiga hiika nyingi z’emisiri y’eby’okurya zicwekyereziibwe. 

Ekigwererezi kikateera ebyaro ebirimu Mandwiga, Wairaganza, Nyafunjo, Rwemiseke na Kasungwa.

Obwa hati abatuura, nibatiina ngu enjara neija kubateera obu ebyokurya byabo byona ebirimu ebicoori, ebihimba, omugusha n’ebitookye ebi baabeire babyaire, byacwekyereziibwe. 

Ab’obushoboorozi okubanagaijura

Arikugaaniiraho n’abanyamakuru, Bosco Sebasumgu, omwe ahabateirwe ekigwererezi eki agizire ngu akafeerwa hiika 2 z’ebicoori na hiika y’ebihimba ebi yaabeire abyaire bwanyima y’okuteerwa orubaare. 

Ashoboroire ngu kuruga obu ekyaro kyabo kigwerwa, tihaine mwebembezi n’omwe kuruga aha disiturikiti owaarahikire omumwanya ogu kureeba embeera eyabahikireho oku erikwingana.

Sebasemgu agizire ngu n’abatuura, bakahandiikira ab’obushoboorozi ahagomborora kandi hoona abaayetsire abebembezi ba disiturikiti barikwetaaga ku bagira eki baakoraho beitu n’okuhisya eriizooba tihaine owaariizireyo. 

Kurugiirira ahari Sebasumgu, bakaba nibateekateeka ngu bwanyima y’okushwijuma embeera eyabahikireho, ab’obushoboorozi bakaba nibaija kubashakira embibo kugaruka bakabyara omumisiri yaabo eyacwekyereire. 

Allen Katarikaawe, nawe omwe ahabatuura abahikirweho ekigwererezi eki, agizire ngu omuyaga gukacwekyereza enju ye, hiika 2 za muhogo n’emiziri y’ebihimba n’ebicoori.
Kansara wa Kyangwali aha disiturikiti ya Kikuube, Olivia Tumusiime, agizire ngu bakeeta ab’orubaju aba Gavumenti y’ebyanga aha disiturikiti kushakira amaka agaateirwe ekigwererezi kwonka tihaine kugarukwamu oku baatungire. 

Kurugiirira ahari Olivia, amaka agawereirwe nigeetaaga obuhwezi bw’ebyokurya hanwe n’ebintu by’okwombekyesa ahari abo abu amaju gaabo gaashenyukire bakasherura oburaaro bw’akaanya-bwanya. 

Ogu ashabire ofiisi y’enganzi y’eihanga, orubaju orw’ebigwererezi kwija bakacungura ekyanga eki. 

Peter Banura, ori Ceyamaani w’entebe ya kataano ahabwa disiturikiti ya Kikuube agizire ngu disiturikiti babaire batakahikire ahamwanya kushwijuma embeera y’emisiri ahabw’okuba disiturikiti tibaine sente z’ebigwererezi kuhwera abatuura abahikiriirwe. 
Okurugiirira ahari we, ofiisiy’enganzi y’eihanga tibaakabagarukamu ga agumize ngu n’ahabw’ekyo tikirikwetaagisa kugarukamu kweta ofiisi egi. 

Peter Banura, ori Ceyamaani w’entebe ya kataano ahabwa disiturikiti ya Kikuube.

“Ebicweka by’eihanga biriyo nibiteerwa ebigwererezi bitari bimwe na bimwe kwonka Gavumenti amaisho egateire ahari Karamoja. N’obu waakuhandiika, tihaine buhwezi obu baraateho,” nikwo agizire. 

Disiturikitiy a Kikuube neekira kuteerwa ebigwererezi. 

Obwahweire, amaka garikurenga omuri 100, omu disiturikiti niyo emwe gakasigara gataine bwegamo  bwanyima y’orubaare kuteera ekyanga rukacwekyereza amaju n’emisiri. 

Abakugu nibeegyekyerera ebigwererezi ebi ahamirimo y’abantu erikushiisha eby’obuhangwa.

#WestUpdates