Julius Hakiza, Omugambirizi wa Pooriisi ahabw’ekyanga ekya Mwitanzigye naagira ngu okucondooza kuriyo nikugyenda omu maisho.

N’ebya Peter Abaanabasazi

KIKUUBE

Pooriisi omu disiturikiti ya Kikuube ekwatsire omukazi orikugambwa kuba aitsire omushaija wa nyina otari ishe kimuzaara (Stepfather).

Nyakuteekateekwaho amanyirwe nka Scovia Ayebale, omutuura wa Kaseta omu gomborora eya Kabwoya omu disiturikiti eya Kikuube.

Ayebale najunaanwa okwita Ernest Twizukye, omutuura wa Nyakabale Nyaseke omuri Kikuube.

Okurugiirira ahari Fabiano Imaniraguha, Kansara w’omuruka gwa Kaseta, omugyenzi nagambwa kuba ateirwe nyakuteekateekwaho omukiro ky’orwakabashatu ebiro 02.04.2025 bwanyima y’ababiri aba kugiraho obuteikirizana bakarwana.

Imaniraguha nashoborora ngu Ayebale na baine-nyina bakafeerwa ishebo emyaka 5 enyima kandi kuruga obwo batwire nibareebererwa nyinabo.

Omu mwaka ogwa 2023, nyina akaija yashwerwa omushaija ondaijo ou yaretsire omu nju y’omushaija we owafiire, ekintu ekyanyigize abaana bakasharamu kuza kupangisa enju omu ka tauni bakatandika kuturayo.

Ahabiro 02.04.2025, Ayebale agiire kutaayaayira nyina. Ku ahikire omu maka g’eishebo omugyenzi, nagambwa kuba atongaine n’omushaija wa nyina otari ishe kimuzaara nikwo kuhendera barwanire.

Omu kurwana okwo, Ayebale nagambwa kuba akwatsire efuka akagiteera Twizukye aha mutwe nikwo kumusiga niguhara eitaka.

Imaniraguha naagira ngu Twizukye airukangziibwe aha “clinic” omu kasheeshe k’orwamukaaga ahi afeereire.

Julius Hakiza, Omugambirizi wa Pooriisi ahabw’ekyanga ekya Mwitanzigye naagira ngu okucondooza kuriyo nikugyenda omu maisho.

#WestUpdates