Misa y'okushabira Aakibiishopu Paul K Bakyenga ahari Nyamitanga...(Photo by Aidan Bataringaya)

‘Aakibiishopu Bakyenga abaire ari omuriisa murungi’ – Abanyadiini

N’ebya Aidan Bataringaya

MBARARA

Abanyadiini n’abakuristo nibongyera kugiraho misa z’okushabira Aakibiishopu Paul K Bakyenga aha kereziya eya Nyamitanga.

Misa y’akasheeshe aka yaayebemberwa Rev. Fr. Richard Ssebugwawo ori Bwanamukuru wa Parish ya Nyamitanga.

Abasaseredooti, abasista, abakuristo n’abanyadiini n’abandi nibakyongyera kushabira omuriisa ofiire Paul K Bakyenga omukereziya eya Nyamitanga, okuhisya obu araziikwe ahasande.

Akasheeshe k’eriizooba, Rev. Fr. Richard Ssebugwawo ori bwanamukuru wa Nyamitanga niwe yayebembera misa.

Ogu yaagira ngu akamurabaho orwakataano esabiiti ehwire omuri Bushenyi ahu abaire natuura, kandi ngu akaba aine ekihika ky’okuhika ahamukoro gw’okutungisa obusaseredooti n’obudiikoni.

Ngu omubuhereza bwe, akaba aine entwaza y’okuheereza ebaruha ahari buri musaseredooti, ey’okumutabarusya yaaba naijuka ekiro kiyatungiireho obusaseredooti.
Bakyenga yagambwaho nk’obaire ari omuriisa murungi kandi akashashurira abasaseredoti baingi sente obwo bari omukutendekwa.

Fr. Ssebugwawo naagira ngu okufa kwe kusaasire baingi ahu n’abamwe batakaikiriize.

Omubiri gw’omuriisa niguteekateekwa kuhika ahari Nyamitanga nyenkyakare shaha 12 z’omumwabazyo kandi emikoro y’okumushendekyereza omukitiinisa.

#WestUpdates