Abakuru kuruga omu UBOS, Lydia Tuhaise na Edbert Oyesiga, bari omumaka ga Ishe-abareeberezi ahabw'eitware erya Mbarara, Lambert Bainomugisha eriizooba 10.05.2024. PHOTO: FATUMAH NAGUDI

Nagudi Fatumah, MBARARA CITY.

Abeebembezi b'Orurmbo Mbarara ab'eby'obutegyeki n'abanyadiini b'enyikiriza zitari zimwe na zimwe bayehanangiriza buri omwe ah'ari kwejumba omunteekateeka ya Gavumenti egi ey'okubara abantu boona kugira ngu kibaase kuhwera eihanga kubateekateekyera gye.

Ishe-abareeberezi w’eitware rya Mbarara, Lambert Bainomugisha, ou twashanga omumaka gye omuri Nyamitanga yabarwa Edbert Oyesiga ori kukora nka dayirekita wa 'Internal Audit' omukitongore kya Uganda Bureau of Standards (UBOS) kandi owaaba narambura n'emirimo y’okubara oku erikugyenda. Aakibiishopu Bainomugisha yaagira ngu abantu baine kwikiriza bakababara ahabw'okuba eki nikiija kuhwera gavumenti kubateekateekyera.

Oyesiga, n'abandi abaaba beebebembeire okubara oku omururembe Mbarara, Patrick Kanamugira na Lydia Tuhaise, nyampara w'orurembo Mbarara omukubara abantu kandi omubazi mukuru w'ebitabo omu UBOS omuri mbarara, baagumizamu baaza omuri Nyakayojo omumaka ga Meeya Robert Kakyebezi kandi hoona nawe ahi baamubarira.

Lydia Tuhaise, Patrick Kanamugira aba UBOS bari omumaka ga Meeya Kakyebezi omuri Nyakayojo ahakubara abantu ah'izooba ry'okubanza. PHOTO: FATUMAH NAGUDI

Meeya yaashaba abantu b'Omururembo Mbarara kwejumba kandi bakaikiriza okubabara agumize ngu nikiija kubahwera ahakubareetera entunguuka nk'okubombekyera amashomero, amarwariro kutunguura eby'amagara, Kubakorera enguuto kurugiirira ahamubaro gw'abantu abaraashangwe bari omururembo oru.

Disiturikiti Khadi wa Mbarara Sheikh Abdallah Mukwaya nawe yaabarwa omumaka gye kandi ogu yaabarwa Lydia Tuhaise. Sheikh Mukwaya yaagira ngu n'ekintu ky'omuhendo ahabw'okuba nikiija kuhwera omukuhisya obuheereza butari bumwe ahabantu omu ihanga.

Lydia Tuhaise ari na District Kadh ahabwa Mbarara, Sheikh Abdallah Mukwaya, omukubara abantu ahakiro ky'okubanza eriizooba ebiro 10.05.2024. PHOTO: FATUMAH NAGUDI

"Okubara abantu tikirimu bwa sitaane kandi n'ekitabo ekirikwera eky'enyikiriza ey'abasiraamu, Qur'an, nikikwegyesa. Kandi bo nk'abeebembezi b'ediini egi baakikora kuba eky'okureeberaho ahabaikiriza," nikwo Kadhi wa disiturikiti ya Mbarara yaayongyeraho.

We, omujwekyerwa wa Purezidenti ahabw'orurembo orwa Mbarara, Lt. Col. James Mwesigye yaahiga abantu okwejumba omubabara kandi yaarabura abo abaragyezeho kuremesa ngu nibaija kubakwata. 

#WestUpdates