Simon Peter Atuhura, omutuura wa Bujumbura East omuri Hoima oitsirwe abainazi aharwakashatu ebiro 18.09.2024.

N’ebya Peter Abaanabasazi  

HOIMA

Abatuura b’omu kyaro ekya Bujumbura omuri West Divijoni, Hoima bagweriirwe akagwe bwanyima y’abainazi b’emihoro kutematema omushaija w’emyaka 22 bakamwita batyo bakasiga bahutaaza na mwine-nyina.

Omugyenzi amanyirwe nka; Simon Peter Atuhura, omutuura wa Bujumbura East omuri Hoima kandi ohutiire ni Conrad Kwikiriza. 

Abainazi aba bataahiriire ababiri aba obu babaire nibagaruka omuka aharwakashatu ebiro 18.09.2024 shaaha nka 5:30 z’ekiro.

Ceeyamaani w’ekyaro ekyo, Emmanuel Kaahwa naagira ngu Atuhura hamwe na mwine-nyina ku bahikire ah’eirimbo erya Bujumbura Catholic Diocese Cemetery, abainazi bashatu bajumbukire omu kishaka batyo batandika kubatema.

Ceeyamaani Kaahwa nakyoreka ngu abainazi aba nibagambwa kuba batemire Atuhura aha mutwe, amaraka n’omu kifuba nikwo kumusiga niguhara eitaka.

Nakyoreka ngu ababiri aba bateire enduuru eshombire abatuura b’omu kyaro ekyo abaizire kubacungura beitu eky’obusaasi Atuhura afiire yaheza kuhikibwa ah’eirwariro erihango erya Hoima ahi abatuura babaire bamwirukangiize.

Omugambirizi wa Pooriisi ahabw’ekyanga ekya Albertine, Julius Allan Hakiza, naagira ngu omuntu omwe orikuteekateekwaho omanyirwe nka Justus Asiimwe, omutuura wa Kaibalya omuri Hoima yaherize kukwatwa kubaasa kuhweraho Pooriisi omu kucondooza kwayo.

Nyakuteekateekwaho okwatsirwe obwa hati akomiirwe aha Pooriisi ya Hoima City CPS obwo okuronda bataahi be kurikugumizamu.

#WestUpdates