Purezidenti Yoweri Museveni.

N’ebya Omushaki weitu

Purezidenti Yoweri Museveni nabwo ori kamanda mukuru w’amahe g’eihanga ahamiize abanya-Uganda ngu eby’okwerinda birigye. 

Purezidenti asiimire ebitongore by’okwerinda ebiri omu eihanga erya Democratic Republic of Congo n’aheeeru yaryo kurwanisa abahekyera.

Omu kihandiiko eki arabize aha mukura gwe gwa X, Purezidenti Musevenu asiimire ebitongore by’okwerinda ahabw’okukwata omuduumizi w’abahekyera ba ADF Abdul Rashid Kyoto orikumanywa munonga nka Njovu.

Naagira ngu Njovu, orikuteekateekwaho kuba ari omwebembezi wa guruupu y’abahekyera 10 abaitsire abarambuzi 2 na dureeva waabo w’omunya-Uganda bakaita abeegi b’eishomero erya Mpondwe-Lhubiriha SS omuri Kasese omu kwezi kwa 6, 2023.

Abahekyera aba bakaba nibenda n’okwosya emotoka ezabaire zipaakingire aharubaju rw’enguuto omuri Kasindi okwezi okuhwaire beitu baremesibwa.

Purezidenti Museveni nabwo asiimire ebitongore by’okwerinda ahabw’okukwata abantu 4 abarikuteekateekwaho kuba baitsire Omutonganiirizi mukuru wa gavumenti, Joan Kagezi. 

Nashoborora ngu omuhigo nigugumizamu guriyo nigugyenda omu maisho kubaasa kurwanisa abahekyera ba ADF.

Museveni ayongiireho ngu omu Uganda, eby’okwerinda byongiirwemu amaani na munonga aha mikoro erikuza kubaho omu eihanga omuri Nyege Nyege, omukoro gwa Kyabazinga ogw’okugaitwa hamwe n’endijo.

#WestUpdates