Abazaire nibaraburwa baaba nibagaruza abaana aha mashomero- Namaye

Abazaire nibaraburwa baaba nibagaruza abaana aha mashomero- Namaye

N’ebya Jeff Andrew Lule

Abazaire nibashabwa okwerinda okutambura n’esente omunshaho obwo amashomero garikwiguraho eriizooba kwenda kwerinda abashuma na munonga abarikutamburira omuri za taxi na boda-boda.

Abazaire n’abeegi nibashabwa kukoresa Mobile Money naaza bank omu kushashura fiizi okurugiirira aha muhwezi w’omugambirizi wa Pooriisi ya Uganda, Polly Namaye.

Namaye naashaba buri muntu weena orikwejunisa enguuto okugira emicwe kandi bahababire abantu boona abu barikuteekateekaho kuba enkozi z’ebihagaro aha Pooriisi kwenda ngu barahuke kukorwaho.

Nahabura abavugi b’ebiruka n’abarikutambuza ebigyere okuba abegyendesereza abaana baaba nibambuka enguuto.

Nabwo, Namaye nahabura amashomero okurinda gye abaana kureeba tibayibwa abainazi.

Yaagira ngu Pooriis eteireho aba Pooriisi b’eby’ahanguuto aha mihanda etari emwe kureeba ngu habaho obuteeka n’abantu kugira emicwe baaba nibakoresa enguuto ezi.

Namaye yakihamisiriza kurungi ngu buri muntu yaaheza kwerinda akakuratira ebiragiro by’ahanguuto, za butandu nizibaasa kwerindwa.

Nakyoreka ngu okukuratira obutumwa oburi aha bwapa bw’ahanguuto nakyo nikikuru munonga.

#WestUpdates