Andrew Byakutaga arikukwatsa abakungu b'eirwariro rya Kibaale Health Centre IV ahakitebe kikuru ky'obukama bwa Bunyoro omururembo Hoima. PHOTO: Wilson Asiimwe

N’ebya Wilson Asiimwe

Obukama bwa Bunyoro Kitara bwahayo ebitanda by’okuzaariraho hamwe n’ebyoma ebirikwita obukooko ah’irwariro rya Kibaale Health Centre IV omu disiturikiti ya Kibaale kutunguura omutindo gw’eby’obuheereza bw’eby’amagara omurubaju orw’okuzaara.

Enganzi y’Obukama, Andrew Byakutaga, obwo arikwebembera omukoro gw’okuhayo ebintu ebi ahakitebe kikuru ky’Obukama omururembo rwa Hoima eriizooba ebiro 09.09.2024, yaagira ngu obuhwezi obu ni kimwe ahabigyendererwa by’Obukama.

Byakutaga yaagira ngu ebintu ebi biguzirwe obwo barikukoresa sente ezirugire omukwiruka okwa Empango okwabeireho omukwezi kwa 6.

“Tukwataniise kandi twatebeekanisa okwiruka kw’Empango ahi obuhwezi bwona obu twaihiremu bukoreziibwe kugura ebikoresa byona ebi turiyo nituhayo eriizooba,” Byakutaga nikwo yaagira.
Jackson Mbeta, orikujunaanizibwa ahakubiika ebintu bya disiturikiti, kandi owaayakiira ebintu ebi yaagira ngu obuhwezi obu nibwija kuhwera ahakuha obuheereza ah’irwariro.

“Ekicweka eki barikuzaariramu ahari Kibaale Health Centre nikiteganisibwa ebizibu bingi. N’ahabw’ekyo enyongyeserezo y’ebitanda egi hamwe n’ebindi bintu neeyakiirwa n’emikono yombi ahabw’okuba orubaju oru rubaire rutaine bintu,” nikwo yaagira

Yayongyera yaagira ngu abakazi b’enda abarikurenga omuri 30 nibaija ah’irwariro buriizooba.

#WestUpdates