Sister Monica Tuhaisemukama arikugyezaho kwasya 'Ambulance' y'aba Rotary Club of Mbarara. PHOTO: Michael Atwakiire

Erizooba aba Rotary Club of Mbarara baheerezayo obuhwezi bw'emotoka y'abarwaire, gyete 'Ambulance', ah'irwariro rya Mushanga Health Centre 3 eririkushangwa omuri Sheema Central Division omu Munisiparite ya Sheema. 

Obuhwezi obu bwakwatsibwa abarikukurira eirwariro eri beebembeirwe ceyamaani w'akakiiko, Celestine Bamwesigye, Mukuru w'eirwariro Sister Rosemary Tuhaisemukama n'abandi omumbuga z'eirwariro nk'omuringo gw'okukyendeeza ahakufa kw'abakazi b'enda n'abarikuba nibazaara. 

Ambulance ei aba Rotary Club of Mbarara baaha Mushanga Health Centre III. PHOTO: Michael Atwakiire

Emotoka egi neija kuhwera abakazi abarikwenda kuzaara hamwe n'abarwaire abandi kubatwara ahamarwariro kandi abatuura nibaija kuba nibatamu amajuta gonka kandi garinganiire gatarikuhenda. 

Eirwariro rya Mushanga Health III rikatandikwaho ekereziya ya Mushanga Parish omumwaka gwa 1958 kandi buri kwezi nibaragurira abarwaire abari ahagati ya 700 - 800 deeru bazaarisa abakazi 40 kuza ahari 60.

Obwa hati Gavumenti ya Uganda erikurabira omukitongore ky'eby'amagara nekwatiraho eirwariro eri, erikuriheereza sente za Primary Health Care grant.

#WestUpdates