Okukorwa kw'enguuto ya Kakiika-Aduram kwatongozibwa bamwe omubebembezi b'orurembo Mbarara eriizooba 09.01.2024. PHOTO: ELI AKIZA

N’ebya Eli Akiza, Mbarara City

Abeebembezi b’orurembo rwa Mbarara eriizooba baatongoza kutandika kukora enguuto 2 ezirikuteekateekwa kumaraho sente zirikuhingura miriyooni 140 kuruga omu purogyekiti erikuhwera Gavumenti z’ebyanga kukora enguuto eya Road Fund.

Omuhwezi wa Meeya wa Mbarara, Priscah Murongo, Kansara w'abakazi owa waadi ya Ruharo, Monicah Mutabaarura hamwe na Al Hajj Abas Kazibwe, orikukiikirira ba kirinju omururembo Mbarara barikworeka amashemererwa ahakutongozaho okukorwa kw'enguuto eriizooba 09.01.2024 omuri Kakiika. PHOTO: Eli Akiza

Enguuto ezi ni Ruharuza-Kabwekyere Road omumashuuma g’orurembo rwa Mbarara hamwe na Kakiika -Aduramu Road omumatemba g’orurembo Mbarara kandi zombi nizihisya oburingwa bwa kiromita 7 n’okurengamu.

Okurugiirira ahabeebembezi enguuto 2 ezi n’ez’okutembuura busya kandi nibagira ngu zitwire zizingamize entunguuka omu byanga ebi kandi izooba eri abatuura b’ebyanga ebi batunga akamwenyo aha matama bwanyima ya Kanso kucwamu okubakorera enguuto.

Meeya wa Mbarara City North Gumisiriza Kyabwisho, Meeya wa Mbarara City, Robert Kakyebezi n'omuhwezi wa RCC wa Mbarara City North, Jacqueline Kankunda barikutongoza okukorwa kw'enguuto za purogyekiti ya Road Fund ez'omururembo Mbarara eriizooba 09.01.2024. PHOTO: Eli Akiza

Enguuto ezi niziija kukorwa abakozi ba kanso hamwe n’ebyoma byayo kandi omurimo n’ogw’okumara obwire butari hansi y’ameezi 2.

Bamwe omu bebembezi abarimu omuhwezi wa RCC wa Mbarara City South Robert Kanusu, na mugyenzi we Jacqueline Kankunda owa Mbarara City North, baashaba abatuura omu rurembo okwebembeza entunguuka. 

Omuhwezi wa RCC wa Mbarara City North, Jacqueline Kankunda na Meeya w'orurembo Mbarara, Robert Kakyebezi barikushwijuma ebihandiiko ebirikukwata ahakukora enguuto za purogyekiti ya Road Fund eriizooba 09.01.2024. PHOTO: Eli Akiza

Meeya w’orurembo rwa Mbarara, Robert Mugabe Kakyebezi, yaashaba abatuura enkwatanisa na munonga omu kuhayo amataka gaabo okurabyamu emihanda n’obu kanso eraabe etaine sente z’okubakaita agumize ngu “okutembuura orurembo nikwetenga amaani ga buri omwe”.

Oruguuto orwa Ruharuza-Kabwekyere Road orw’oburingwa bwa kiromita 3.79 nirwija kumaraho shiringi miriyooni 64,545,153 kandi Kakiika-Aduram Road orw’oburingwa bwa kiromita 4.2 nirwija kumaraho shiringi miriyooni 79,372,920.

#WestUpdates