Ehururu ey'okubara abantu n'ebintu neija kutandika Orwakataano ebiro 10/05/2024 kandi neija kumara ebiro 10. Photos by Muhaburane Levi.

N’ebya Muhaburane Levi

MBARARA

Gavumenti erangiriire eizooba ry’orwakataano rwa wiiki egi ebiro 10/05/2024 nk’ekiro kikuru kwenda ngu abantu babaase kwetaba omuhururu y’okubara abantu n’ebintu byabo gyete National Population and Housing Census.

Ehururu egi neija kutandika Orwakataano kandi neija kumara ebiro 10.

Ceeyamaani wa boodi ahabw’ekitongore ekya Uganda Bureau of Statistics (UBOS), Albert Byamugisha nashaba abantu okuguma omu maka gaabo omu bwire bw’okubara abantu kandi bakwatanise n’abarabe nibababara kureeba ngu babagambira ebintu ebihikire kubaasa kworobya omurimo gwa gavumenti ogw’okuteekatekyera abantu bayo.

Omu bindi nk’ekyo, omu rurembo rwa Mbarara, Meeya Robert Mugabe Kakyebezi nashaba abanya-Uganda okwakira ehururu egi bagyejumbiremu. Kakyebezi agambire ebi obu tiimu y’abarikubara abantu babaire nibabuganaho abanyamukuru ahari City Mall nyomwebazyo.

Omurukiiko nirwo rumwe, Lt. Col. James Mwesigye- RCC wa Mbarara City ahamiize abatuura b’omu rurembo eby’okwerinda birikumara omu biro 10 eby’okubara abantu.

Gavumenti erangiriire Orwakataano orw’ebiro 10 nk’ekiro kukuru.

Patrick Kamugisha, Orikukurira eby’okubara abantu omu rurembo rwa Mbarara naagira ngu abantu boona hatariho kureebera oburugo bwabo nibeija kubarwa.

#WestUpdates