Minisita w'ebiragiro, Norbert Mao, mukuru w'akakiiko k'eby'oburuuru, Simon Byabakama hamwe n'enganzi y'eihanga, Robinnah Nabbanja bari omu rukiiko aha Hotel Africana, Kampala.

N’ebya Beth Akatukunda

Akakiiko k’eby’oburuuru kaagira ngu nikateebereza kukoresa esente ezirikwingana akatabarwa 1.38 (1.38 trillion shillings) omu kutebeekanisa akaruuru ka boona aka 2026.

Ebi byagambwa omuhandiiki w’akakiiko k’eby’oburuuru, Leonard Mulekwah eriizooba aha kutongozaho engyenderwaho y’akakiiko ey’akaruuru ka 2025-2026 omuri Kampala.

Okurugiirira ahangyenderwaho, okushwijuma empapura z’eby’obwegyese kw'abarikwenda kwesimba ahabwa Purezidenti, abany’ishengyero n’abeebembezi ba za disiturikiti n’endembo nikuteekateekwa kubaho ahagati y’ebiro 03/07/2025 na 01/08/2025.

Okuhandiika abarikwenda entebe z’eminyeeto, abantu abaine oburema aha mibiri yaabo, abagurusi n’abakaikuru hamwe n’okushwijuma  amaziina g'abateezi b’akaruuru omubitabo nikuteekateekwa kubaho ahagati y’ebiro 03/01/2025 na 24/01/2025.

Mulekwah yaagira ngu abakozi ba gavumenti abarikwenda kwesimba omu by’obwebembezi baine kuhisya ebiro 13/06/2025 kuba baarekwire.

Okurugiirira ahangyenderwaho, okuteera akaruuru k’obwa Purezidenti, abany’ishengyero n’abeebembezi ba gavumenti z’ebyanga nikwija kubaho ahagati y’ebiro 12/01/2026 kuhisya ebiro 09/02/2026.

#WestUpdates