Akakooko ka siriimu nikeyongyera omu baishiki bato n’abakazi okurugiirira aha kitongore ekya Uganda AIDS Commission.

N’ebya Beth Akatukunda

MBARARA

Ekitongore ekya Uganda AIDS Commission nikigira ngu n’obu hateirweho emiringo etari emwe ey’okutangira n’okurwanisa okujanjaara kw’akakooko ka siriimu, beitu abashaiki bato n’abakazi nibakyeyongyera kutunga akakooko ka siriimu na munonga ab’omu myanya y’etauni.

Dr. Steven Asiimwe, Orikukurira eby’okurwanisa endwara y’akakooko ka siriimu omu kitongore ekya Uganda AIDS Commission naagira ngu ekireteire abaishiki bato n’abakazi bayeyongyera kukwatwa akakooko ka siriimu n’ahabw’obutagira ky’okukora n’esente ekibagyemesereize kutandika kuza kweguza.

Dr. Asiimwe agambire ebi omu mushomo gw’abanyamakuru agw’okurwanisa okujanjaara kw’endwara y’akakooko ka siriimu ogubaire guteebekanisiibwe aba Uganda AIDS Commission aha Oxford Hotel omu rurembo rwa Mbarara aharwakabiri ebiro 04.06.2024.

Okurugiirira ahari rupoota ya Uganda AIDS Commission, okujanjaara kw’akakooko ka siriimu omu bantu abakuzire kuri ahaiguru ahabw’okugira ngu abamwe baine esente kandi abarikukwatwa munonga akakooko aka abaingi n’abaishiki bato n’abakazi ahabw’okutagira ky’okukora n’okugumirwa oku barabeho ekirikubareetera bayirukangira omukuza kweguza kubaasa kutunga okubarabeho.

Eki kireteire akakooko ka siriimu kayeyongyera kujanjaara omu eihanga.

Dr. Asiimwe nakyoreka ngu za disiturikiti enyingi omu kyanga ekya Burengyerwa-Izooba, okujanjaara kw’akakooko ka siriimu kuri ahaiguru okukira okw’eihanga okuri aha bucweka 5.1 ahari 100.

Omu rurembo orukuru orwa Fort-Portal nirwo rwebembiirwe omukugira omubaro mwingi gw’abantu abaine akakooko ka siriimu ahi eine obucweka 17.8 ahari 100, hakurataho disiturikiti eya Mbarara eine obucweka 14.4 ahari 100 na disiturikiti ya Kabarole n’eya kashatu n’obucweka 10.6 ahari 100.

Disiturikitiy a Kiruhuura eine obucweka 9.5 ahari 100 bw’abantu abaine akakooko ka siriimu, Bushenyi eine obucweka 9.2 ahari 100 kandi Mbarara City eine obucweka 8.1 ahari 100 bw’abantu abaine akakooko ka siriimu n’ezindi.

#WestUpdates
#RadioWestAt25